समाचार

माओवादीबाट कांग्रेसले सिक्योः ओखलढुङ्गामा मतपत्र च्यातेपछि गणना स्थगित

माओवादीबाट कांग्रेसले सिक्योः ओखलढुङ्गामा मतपत्र च्यातेपछि गणना स्थगित

०७४ सालको स्थानीय तह निर्वाचनमा चितवनको भरतपुरमा देखिएको समस्या यो निर्वाचनमा ओखलढुङ्गामा सरेको छ। भरतपुरमा माओवादी कार्यकर्ताले सिकाएको मतपत्र च्यात्ने उपाय ओखलढुङ्गाामा कांग्रेस कार्यकर्ताले सिकेका छन् ।

कांग्रेस कार्यकर्ताले मतपत्र च्यातेपछि चिशंखुगढी गाउँपालिका–३ को मतगणना रोकिएको छ । वडाको मतगणना गर्दा नेपाली काँग्रेस र माओवादीबाट वडाध्यक्ष उम्मेद्वारको मत बराबर भएपछि पुनः गणना गरिएको थियो । पुनः मत गणना गर्ने क्रममा करिब ३ सय मत गनिसकेपछि काँग्रेसका प्रतिनिधिले दुई थान मतपत्र च्यातेको वताईएको छ। उनीहरुले बदर भनेर राखिएको दुई थान मतपत्र तानेर च्यातेका हुन् ।

चिशंखुगढी गाउँपालिकाकी निर्वाचन अधिकृत कमला काफ्लेले कााग्रेसको प्रतिनिधिले मतगणनाको क्रममा बदर भनेर राखिएको दुई थान मतपत्र तारजाली बाहिरबाट हात हालेर तानेर च्यातेको बताइन् ।

मतपत्र च्यातेको आरोपमा प्रहरीले तीन जनालाई नियन्त्रणमा लिएको छ। डिएसपी सुकदेव खनालले काग्रेसका जिल्ला सचिव समेत रहेका राजकुमार ढुंगाना सहित तीनलाई नियन्त्रणमा लएको वताए । 

निर्वाचन कार्यालयले सर्वदलीय बैठक राखेर कसरी बाँकी मतगणना गर्ने भन्ने विषयमा छलफल गर्न लागेको छ।

चिशंखुगढीमा माओवादी र कांग्रेसकै गठबन्धनमा प्रमूख र उपप्रमूखको उम्मेद्वार विजयी भईसकेका छन् । वडा नं. ३ मा भने गठबन्धन हुन नसक्दा कांग्रेस माओवादीको छुट्टाछुट्टै वडाअध्यक्षको उम्मेद्वार प्रतिस्पर्धामा थिए ।