राजनीति

विदेशबाट फर्काइने नेपाली राख्ने विषयमा शहरी विकास मन्त्रालयले थाल्यो गृहकार्य

विदेशबाट फर्काइने नेपाली राख्ने विषयमा शहरी विकास मन्त्रालयले थाल्यो गृहकार्य

काठमाडौं ।विदेशबाट फर्किएका नागरिकहरुलाई राख्न आवश्यक क्वारेन्टिन व्यवस्थापनका लागि होटल तथा रिसोर्टहरु प्रयोगमा ल्याउने तयारी गरिएको छ । बिहीबार शहरी विकस मन्त्रालयमा भएको छलफलमा शहरी विकास राज्यमन्त्री रामवीर मानन्धरले देशभर व्यवस्थित रुपमा चलेका होटल तथा रिसोर्टहरुलाई क्वारेन्टिन स्थल बनाउनेबारे आवश्यक परामर्श थालिएको बताए ।

देशभरका क्वारेन्टिनको अनुगमन र सहजीकरणको जिम्मेवारीमा समेत रहेका मन्त्री मानन्धरले मुलुक र जनता संकटमा परेको बेला सरोकारवाला सबैले सरकारलाई आवश्यक सहयोग गर्नुपर्ने बताए ।

मन्त्री मानन्धरले देश नै संकटमा परेका बेला ठूला होटलहरुलाई क्वारेन्टिन स्थलका रुपमा व्यवस्थापन गर्न सरकारले पहल थालिरहेको बताउँदै व्यावसायीबाट आवश्यक सहयोगको अपेक्षा समेत गरे । मन्त्री मानन्धरले हाल खाली रहेका होटलहरुलाई निश्चित रकम तिरेर सरकारले जनताको जिवन रक्षाका लागि प्रयोग गर्न सक्ने बताएका हुन् ।

विदेशमा विपद्मा परेका नागरिकहरुलाई सरकारले उद्दार गरि ल्याएको अवस्थामा उपत्यकामा आवश्यक क्वारेन्टिनका लागि पुर्व तयारी गरिएको बताउँदै मन्त्री मानन्धरले हाल उपत्यकामा ५ सय १८ वटा बेड तयारी अवस्थामा रहेको बताए ।

विदेशबाट फर्किने मजदुर वर्गका सर्वसाधारण र अन्य प्रयोजनमा विदेश गएर फर्कन लागेकाहरुबीच वर्गिकरण गरिने बताउँदै श्रमका लागि खाडी लगायतका मुलुकमा पुगेर विपदमा फसेका कामदारलाई सरकारले प्राथमिकता दिने मन्त्री मानन्धरले बताए ।

खाडी मुलुकमा श्रमका लागि गएका सर्वसाधारणलाई सरकारले क्वारेन्टिन लगायतका व्यवस्थापनमा प्राथमिकतामा राख्ने बताउँदै मन्त्री मानन्धरले विपदमा फसेका नेपालीबारे सरकार चिन्तित रहेको बताए ।

हवाई मार्ग भएर फर्कनेहरुका लागि उपत्यकामा अस्थायी क्वारेन्टिन बनाउने र सम्बन्धित स्थानीय तह मार्फत् व्यवस्थापन गर्नेबारे सरकारले छलफल गरिरहेको मन्त्री मानन्धरले बताए । देशभर करिब ६५ हजार क्वारेन्टिन बेड तयारी अवस्थामा रहेको प्रतिवेदन आफूकहाँ आइपुगेको बताउँदै मन्त्री मानन्धरले २५ हजार सर्वसाधारण क्वारेन्टिनमा रहेको जानकारी समेत दिए ।

केही स्थानमा क्वारेन्टिन व्यवस्थापनमा कमजोरी देखिएको बताउँदै मन्त्री मानन्धरले तत्काल सुधारका लागि सरकारले आवश्यक समन्वय गरिसकेको बताए । क्वारेन्टिन व्यवस्थापनको खर्च संघीय सरकारले व्यहोर्ने बताउँदै मन्त्री मानन्धरले निर्धक्क भएर व्यवस्थापनमा लाग्न देशभरका स्थानिय सरकारहरुलाई आग्रह समेत गरे ।

भारतमा काम गर्दैआएका हजारौं सर्वसाधारण नेपाल भित्रन खोजिरहेको बताउँदै मन्त्री मानन्धरले उनीहरुको आवश्यक व्यवस्थापनका लागि सम्बन्धीत क्षेत्रका स्थानीय तह लगायत सरोकारवाला निकायलाई आग्रह समेत गरे ।

कार्यक्रममा अनुगमन तथा सहजीकरणको जिम्मेवारीमै रहेका स्वास्थ्य तथा जनसंख्या मन्त्री नवराज रावतले सरकारले बनाएको मापदण्ड अनिवार्य रुपमा पालना गर्न स्थानीय सरकारलाई आग्रह गरे । मन्त्री रावतले क्वारेन्टिनमा आवश्यक खर्चबारे चिन्ता नलिन स्थानीय सरकारलाई आग्रह पनि गरे ।

दार्चुला, बाँके, बर्दिया,जुम्ला, बाजुरा, पर्सा, कैलाली,कञ्चनपुर लगायतका जिल्लामा भारतबाट आउने सर्वसाधारणको व्यवस्थापनमा समस्या देखिएको बताउँदै मन्त्री रावतले व्यवस्थापनमा कमजोरी हुन नदिने बताए ।

कार्यक्रममा पर्यटन मन्त्रालयका सचिव केदारबहादुर अधिकारीले क्वारेन्टिन व्यवस्थापन कार्यविधि पालना गरिए समस्या नआउने बताउँदै बजेट व्यवस्थापनमा देखिएको समस्या समाधानका लागि अर्थ मन्त्रालयलाई आग्रह गरे । सचिव अधिकारीले ठूला होटलहरुलाई आवश्यक समयमा सरकारले प्रयोग गर्ने बताए ।