हाम्रो पात्रो विज्ञापन
मुख्य समाचार

प्रधानमन्त्री ओली र मोदीद्वारा एकीकृत भन्सार जाँचचौकी उद्घाटन

प्रधानमन्त्री ओली र मोदीद्वारा एकीकृत भन्सार जाँचचौकी उद्घाटन

विराटनगरः प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीले विराटनगरमा निर्मित एकीकृत जाँच चौकी मङ्गलबार भिडियो कन्फ्रेन्सका माध्यमबाट संयुक्त रुपमा उद्घाटन गरेका छन् । प्रधानमन्त्री केपी शर्मा ओलीले काठमाडौँ र उनका भारतीय समकक्षी नरेन्द्र मोदीले दिल्लीबाट एकै समयमा ‘स्वीच अन’ गरी चौकीको शुभारम्भ गरेका हुन् । उद्घाटनका अवसरमा ओली र मोदीले संक्षिप्त सम्बोधनसमेत गरेका छन् । 

प्रधानमन्त्री ओलीले अङ्ग्रेजी भाषामा सम्बोधन गरे भने मोदीले नेपाली र हिन्दी भाषामा सम्बोधन गरेका हुन् । सम्वोधनको क्रममा भारतीय प्रधानमन्त्री मोदीले नयाँ वर्ष २०२० को शुभकामना समेत दिँदै नयाँ वर्षमात्र नभएर नयाँ दशकको सुरुवात भएको बताए । 

मोदीले नयाँ वर्ष र नयाँ दशकको सुरुवातमै नेपाल र भारत शुभकार्यमा सामेल भएको भन्दै एकीकृत जाँच चौकी निर्माण हुनु दुई देशबीचको साझेदारीको एउटा उदाहरण रहेको बताए । पाँच महिनामा दोस्रो पटक यस प्रकारको भिडियो कन्फ्रेन्सबाट दुई अलग परियोजना उद्घाटन भएको भन्दै उनले यसलाई प्रविधिको विकासको उदाहरणका रुपमा समेत प्रस्तुत गरे । 

सम्वोधनका क्रममा प्रधानमन्त्री ओलीले नेपाल र भारत दुवै मुलुकमा स्थिर र बहुमतको सरकार रहेका कारण आपसमा अल्झिएका मुद्दाहरुलाई मिलेर सुल्झाउन सकिने बताए । प्रधानमन्त्री ओलीले नेपाल र भारत भूगोल, इतिहास, संस्कृतिले सदियौंदेखि निकट रहँदै आएको चर्चा गर्दै आगामी दिनमा आपसी सम्बन्ध थप प्रगाढ बन्दै जाने विश्वास व्यक्त गरे । 

विराटनगर भन्सार कार्यालयदेखि पूर्व भारत सिमानासँग जोडिएको बुधनगरमा सो चौंकी १ सय २९ बिघा क्षेत्रमा तयार गरिएको छ । चौकी निर्माण गर्न भारत सरकारसँग सन् २००६ मै सम्झौता भए पनि यसको निर्माण सन् २०१६ देखि शुरु भएको थियो ।

भारत अहमदावादका दिनेशचन्द्र आर अग्रवालले भारतीय एक अर्ब १४ करोड लागतमा निर्माण गर्न ठेक्कामा लिएका थिए । विराटनगर भन्सार कार्यालयबाट हुने सबै काम एकीकृत जाँचचौकीबाट शुरु भएपछि विराटनगर रानीसँग जोडिएर रहेको जोगबनी बजार पनि सहज हुने र सवारीको चाप स्वतः घट्ने विश्वास गरिएको छ । 

विराटनगर केपी शर्मा ओली नरेन्द्र मोदी एकीकृत जाँच चौकी