अन्तरवार्ता भिडियो Breaking News

असारे विकासको नाममा दैनिक चार अर्ब स्वाहा, यो प्रणालीले देश चल्दैन

असारे विकासको नाममा दैनिक चार अर्ब स्वाहा, यो प्रणालीले देश चल्दैन

राप्रपा संयुक्तका नेता राजाराम श्रेष्ठले वर्तमान सरकारले असारे विकासका नाममा ब्रम्हलुट मच्चाएको भन्दै यसको छानबिन गरी दोषीलाई कारवाही गर्नुपर्ने बताएका छन् । 

नेपाल आजसंगको साक्षात्कारमा नेता श्रेष्ठले दैनिक साढे चार अर्ब रकम विकासको नाममा खोलामा बगाइएको आरोप लगाए । 
उनले भने, ‘ विकास भनेको योजनामा आधारित हुनुपर्छ, सन्तुलित हुनुपर्छ, दीगो हुनुपर्छ । तर यहाँ त पैसा सक्ने उद्देश्य मात्र राखिएको छ । पिच माथि पिच गरिएको छ । झमझम पानी परिरहेको छ, सडक पिच हुँदैछ, त्यो पनि हप्ता दिन टिक्दैन । यो भनेको आफनो पार्टी निकटका ठेकेदारलाई काम दिएर आफूले कमिसन कुम्ल्याउने नियत मात्र हो । ’

">

नेता श्रेष्ठले मुलुकमा ठूलाठूला भ्रष्टाचारका काण्ड छानबिन नहुनुमा पनि वर्तमान सरकार नै दोषी रहेको आरोप लगाए । वाइडबडी, फोर जी, सुन प्रकरण, बालुवाटार जग्गा लगायतका काण्डमा छानबिन नगर्नु नै यो सरकार र नेकपा पार्टीका नेता भ्रष्टाचारमा संलग्न छन भन्ने पुष्टि भएको उनले बताए । 
श्रेष्ठ भन्छन्, ‘भ्रष्टाचारीलाई फूलमाला लगाएर स्वागत गर्ने कुरा भएन, विद्यमान कानून अनुसार कडा कारवाही गर्नुपर्छ, जेल कोच्नुपर्छ । ’
नेता श्रेष्ठले मुलुकलाई निकास दिएर विकास र समृद्धिको मार्गमा लैजाने हो भने सबै राजनीतिक दलहरुले संवैधानिक राजसंस्था र हिन्दू राष्ट्रको एजेण्डामा सहमति जनाउनुपर्ने धारणा राखे । 

‘यो देश वर्वाद हुन थालिसक्यो । विदेशी चलखेल र अतिक्रमण डरलाग्दो रुपमा आएको छ । देश रहे न हामीले राजनीति गर्ने हो । यसकारण अहिलेको प्रणालीबाट मुलुक चल्दैन । यसका लागि के कांग्रेस, के नेकपा, के राप्रपा, के मधेशी दल सबै शक्तिहरु राजसंस्था र हिन्दु राष्ट्रको एजेण्डामा आउनुपर्छ । यसो भयो भने मात्र मुलुक बच्छ ।’ श्रेष्ठले भने ।

 ">

नेता श्रेष्ठका अनुसार राप्रपा संयुक्त र राप्रपाबीच चाँडै एकता हुँदैछ । पार्टी सिद्धान्त र दर्शन एउटै भएपछि हिंड्ने बाटो पनि एउटै हो । एकताका लागि सांगठनिक र जिम्मेवारी व्यवस्थापनमा काम भैरहेको र अब त्यो पनि चाँडै पूरा हुनेछ । 

हाल पार्टीमा पशुपतिशम्शेर राणा र डा. प्रकाशचन्द्र लोहनी अध्यक्ष छन् । कमल थापा नेतृत्वको राप्रपासंग एकता पूरा भएपछि तीनवटा अध्यक्ष हुने सम्भावना पनि प्रबल छ । त्यसपछि पार्टीको महाधिवेशनले प्रक्रियागतरुपमा पार्टीलाई अघि बढाउँछ । 
अहिले छिन्नभिन्न रहेको नेता र पार्टीलाई एकीकृत गरेपछि त्यसपछि बिभिन्न क्षेत्रमा ख्यातीप्राप्त व्यक्तिलाई पार्टीमा भित्र्याउने काम सुरु हुने श्रेष्ठको भनाइ छ । 

">
    

राप्रपा संयुक्त