अन्तरवार्ता भिडियो Breaking News कभर स्टोरी

सांसदको काम ऐन कानून बनाउने मात्र होइन विकास गर्ने पनि हो (भिडियोसहित)

सांसदको काम ऐन कानून बनाउने मात्र होइन विकास गर्ने पनि हो (भिडियोसहित)


बजेटमा सांसदका लागि ६ करोड रकम छुट्याइएको विषय अहिले पनि सेलाएको छैन । कतिपयले यसलाई सकारात्मक भनेका छन् भने कतिपयले सांसदलाई निर्वाचन खर्च उठाउन प्रदान गरिएको रकम भन्दै आलोचना समेत भएको छ । 


नेपाली कांग्रेसका सांसद एवम पूर्वमन्त्री मोहम्मद् अफताव आलम ६ करोड दिने निर्णय स्वागतयोग्य ठान्छन् । उनका अनुसार रकम अझ थप्नुपर्छ । कम्तिमा पनि ८ करोडसम्म बनाउनुपर्ने उनको सुझाव छ । 

">
उनका अनुसार नेपालमा अहिले सांसदलाई कमजोर पार्ने प्रयास भइरहेको छ । कुनैपनि सांसदको जनतासँग अन्योन्याश्रित सम्बन्ध हुन्छ । सांसदले आफ्नो गाउँ ठाउँका जनतालाई पुल पुलेसो, सडक, विद्यालय, अस्पताल बनाउने वचन दिएको हुन्छ । त्यो भनेको सोझै जनताको पीर मर्कासंग जोडिएको विषय हो । सांसद निर्वाचित भैसकेपछि आफूले बोलेको कुरा पूरा गर्नुपर्ने बाध्यता हुन्छ, त्यो जिम्मेवारी पनि हो । यसकारण सांसदको छनोटमा पर्ने योजनाका लागि सरकारले रकम दिनुलाई अन्यथा बुझ्नु हुँदैन । यसलाई समर्थन गर्नुपर्छ । 


सांसदको काम ऐन कानून मात्र बनाउने हो भनेर जसरी व्याख्या गरिदैछ, त्यो गलत हो । सांसदको काम भनेको ऐन, कानूनसँगसँगै विकास पनि गर्ने हो । नेपालको सन्दर्भमा यो अवधारणा नै उपयुक्त छ । भारतमा पनि सांसद्हरुका लागि विशेष बजेट छुट्याउने गरिन्छ । सांसदले स्थानीय तहसंग समन्वय गरी विकास निर्माणका काम अघि बढाउने काम गर्छ । 


अहिले सांसदलाई ल्यापटप दिने कुराको पनि विरोध भएको सुन्छु । त्यो होइन । सांसदलाई ल्यापटप दिंदा केही बिग्रिदैन । अहिलेको समयमा साँसदलाई प्रविधिमैत्री बनाउँदै छिटो भन्दा छिटो काम सम्पन्न गर्न यो प्रकारको सुविधा दिइन्छ भने त्यसलाई बेठिक भन्नु हुँदैन । 


सांसद आलमले मुुलुक विकासको बाधक नै भ्रष्टाचार भएकाले यसको अन्त्यका लागि सबै क्रियाशील हुनुपर्ने धारणा राखे । उनले नैतिकताबिना भ्रष्टाचार अन्त्य हुन नसक्ने भएकाले सानादेखि ठूला मान्छे सबैमा नैतिक मूल्य मान्यताको विकास गराउनुपर्ने आवश्यकता औंल्याए ।

">
पछिल्लो समय सरकारले गुठी विधेयक ल्याएर मुलुकको धर्म संस्कृतिमाथि प्रहार गरेको उनको आरोप छ । सरकारले मुलुकको मौलिकतामाथि धावा बोलेपनि नेपाली कांग्रेस र नेपाली जनताले त्यसलाई परास्त गरिदिएको उनी बताउँछन् । 


मुलुकको धर्म संस्कृति माथि नै प्रहार गर्ने वर्तमान सरकारबाट मुलुकको विकास र समृद्धि सम्भव नभएको आलमको बुझाइ छ । सरकारले ल्याएको बजेट तथा नीति कार्यक्रम समृद्धि केन्द्रीत नभएको उनको आरोप छ । सरकारले एकपछि अर्को गर्दै निरंकुशतालाई मद्दत पुग्ने किसिमका विधेयक ल्याएर आफनो अधिनायकवादी चरित्र उदाङ्गो पारेको उनी बताउँछन् । 


नेपाली कांग्रेसले निर्वाचनमा हार बेहोरेपनि अहिले सुधार गरिरहेको छ । अझ दुई नम्बर प्रदेशमा त कांग्रेसको अवस्था झन बलियो बन्दै गएको छ । अब आउँदो चुनावमा हिमाल, पहाड, तराईं सबै ठाउँमा हामी अत्यधिक बहुमतले जित्नेमा कुनै शंका छैन । 

">