विचार कला साहित्य

जोशमा हुन्न होश

जोशमा हुन्न होश


घरी घरी लाग्ने गर्छ जिन्दगानी के गर्नु
तिमी छैनौ भएर यो जवानी के गर्नु

 

सुमन स्मारिकाको यो गजल निकै चर्चित छ । सामाजिक संजालमा गजल सुन्दै वाह ! वाह ! भन्दै आपसमा शेयर हुने क्रम पनि त्यत्तिकै छ । गजल पुरानै भएपनि यसले बोक्ने भाव र दिएको सन्देश गज्जब छ । 

 


हुन पनि जवानी साँचेर के काम ? एकबारको जुनीमा जवानीको उपयोग गरेर तनमन किन आनन्दित नबनाउनु ? मरिजाने चोला न हो । गोपालप्रसाद रिमालले  आफनो कवितामा भने जस्तो, आउ हामी सहवास गरौं, म तिमीलाई गर्भाधान गर्छु । 

 


ओ युवती, ओ रुपवती,
अर्कोचोटि तिमीलाई भेट्दा
म तिमीलाई सोझै भन्नेछु
‘म तिमीलाई गर्भाधान गर्छु’

 

तर, जीवनमा होश पुर्याउन पनि जरुरी छ । कुमार बस्नेतको गीतमा भने जस्तो ‘ जोशमा हुन्न होश’ पनि त गर्नुभएन । अहिले नेपाली समाजमा जोशमा होश गुमाउँदा त थुप्रै विकृति बिसङ्गति देखा परेका छन् । 

 


किशोर किशोरी मात्र होइन विवाहइतर प्रेम तथा यौन सम्बन्ध राख्नेहरु पनि प्रशस्त छन् । अझ शहरी क्षेत्रमा त पत्नी तथा पति साटासाट समेत हुने गरेको सुन्न थालिएको छ । लामो समय श्रीमान श्रीमती छुट्टिनु पर्दाको नकारात्मक परिणाम दैनिक सुन्नमा आइरहेका छन् । 

 


प्रेम त नाम मात्र हो, चाहना त वासना नै हो । यौन नै हो । साँचो वा भनौ आत्मिक  प्रेम त भन्ने कुरा मात्र भएको छ । अझ यौनको पनि व्यापार हुन थालेको छ । सम्बन्ध पनि स्वार्थका लागि मात्र गाँसिन थालेका छन् । ती सम्बन्धमा कुनै लगाव छैन, प्रेम छैन, अनुभूति छैन, मात्र प्रेमको कृत्रिम लेपन । 

 


यिनै कारणले परिवार तथा समाजमा हिंसा बढेको छ । मानवीय संवेदना समाप्त हुन थालेको छ । निकै विकृति बढ्न थालेपछि अहिले अमेरिकाका विभिन्न राज्यमा कुनैपनि प्रकारको गर्भपतन निषेध गर्ने कानून पारित भएका छन् । 

 


नेपालमा आफनो शरीरमा आफनो अधिकार भन्दै गर्भपतनले मान्यता पाएका बेला संसारकै नेतृत्व गरिरहेको आधुनिक देश भनिएको अमेरिकामा यो प्रकारको कानून बनेपछि धेरै मानिस चकित परेका छन् । यद्यपी यो कानूनको विरोधमा प्रदर्शन भैरहेका छन् तर ती प्रदर्शनले पारित भएका कानून फिर्ता हुने सम्भावना छैन । 

 


पछिल्लो समय नेपालमा प्रविधि र देखासिकीले मात्र यौनतर्फ आकर्षित गरेको छैन, हाम्रा साहित्यकारले सृजना गर्ने कविता, गीत, गजलले पनि त्यसलाई मलजल गरेको पाइन्छ । अझ गीतको छायाङ्कनमा देखाइने कथावस्तुले ‘मल्टिरिलेसन’ लाई सामान्य नै बनाएको पाइन्छ । जुन कुरा हाम्रो कानूनले निषेध गर्छ, त्यो विषयवस्तुको कथा समेटिएका सामग्री राष्ट्रिय संचारमाध्यममा निर्वाधरुपमा प्रसारण भैरहेको हुन्छ । अर्को उदाहरण दिन्छु, गजलकार प्रकट पगेनी शिवको । 

 


साँझ थियो तिमी थियौ, हल्का हल्का मात थियो
जुनेलीको उज्यालोमा जवानीको वात थियो 

 

यहाँ पनि जवानीकै कुरा छ  । अर्थात भनौ मीठासपूर्ण यौनमा गएर गजल टुंगिन्छ । सुन्न त बडो आनन्द आउँछ । प्रेम र यौन मानव जीवनका लागि अपरिहार्य छन्, तर कहिलेकाहिं मन भड्काउन यस्तै सृजनाले काम गरिदिन्छन् । 

 

अर्की चर्चित गजलकार शीतल कादम्बिनीको गजल पनि यस्तै छ । यसलाई चर्चित गायक शिव परियाले गाएका छन् । 


कहाँ थियौ तिमी रंगमञ्च उठेपछि आयौ
समयले जवानी लुटेपछि आयौ 

 

गजलकार कादम्बनीको यो गजलमा पनि यौन भाव नै प्रकट भएको छ । जवानी हुन्जेल तिमी आएनौ, अब जवानी छैन, तिमी आएर के काम ? 
वास्तवमा यहाँ यदि प्रेम हो भने जवानी कुर्नुपर्ने किन ? जवानीमा मात्र प्रेम हुने हो र ? तर, गजलमा प्रेम भन्दा यौन पक्ष बढी हावी छ । 

 

 

प्रेमले सिंगारिएका यौन बाहुल्य सृजना हामीकहाँ प्रशस्त छन् । सृजनामा त एक हदसम्म इमान्दारी देखिन्छ तर मानिस प्रेम र यौन दुवैमा बेइमान हुँदै गएको छ । जंगली पारा बढी देखिन्छ । 

 

 

प्रेम र यौनको आवेगले जसरी सम्बन्धमा समस्या ल्याउँदै आपराधिक गतिविधिसमेत बढाइरहेको छ, त्यसले भविष्यमा थप विकराल समस्या निम्त्याउने देखिन्छ । एक बृद्धबाट बालिका र एक युवाबाट बृद्धासमेत बलात्कार भइरहेका बेला यौनजन्य गतिविधि बैंश अर्थात जवानीमा मात्र हुन्छन् भन्ने छैन । 

 

 

यौन भन्ने कुरा शारीरिक कम र मानसिक बढी हो । यसकारण यौनजन्य गतिविधि उमेर नियन्त्रित मात्र हुँदैनन् । मात्र ‘जोशमा हुन्न होश’ भन्ने उक्तिलाई गलत सावित गर्न सक्नु पर्यो ।   

ADVERTISEMENT

यस्ता छन् नेपाल टेलिकमका सस्ताे दरका डाटा प्याक योजना

नेपाल टेलिकमले सस्तो दरको भ्वाइस प्याक, डाटा प्याकलगायतका प्याक उपभोक्तालाई दिइरहेको छ। जसमा अल टाइम भ्वाइस प्याक, नाइट टाइम भ्वाइस प्याक, डे प्याक तथा विधिन्न किसिमका डाटा प्याकहरूका योजना रहेका छन्। योजनामा टेलिकमले एक अर्कामा असिमित रूपमा कल गर्नुका साथै थप डाटा, एसएमएस सुविधासमेत प्रयोग गर्न सकिने प्याकेजसमेत उपलब्ध गराइरहेको छ।