समाचार स्वास्थ्य

चार महिनामा स्वाइन फ्लुबाट १८ जनाको मृत्यु, सबैभन्दा बढी काठमाडौंमा

चार महिनामा स्वाइन फ्लुबाट १८ जनाको मृत्यु, सबैभन्दा बढी काठमाडौंमा

काठमाडौं । नेपालमा ‘मौसमी रुघाखोकी’ नामले चिनिने स्वाइन फ्लुबाट चार महिनामा १८ जनाको मृत्यु भएको छ। पुसयता स्वाइन फ्लुको संक्रमणबाट १८ को मृत्यु भएको इपिडिमियोलोजी तथा रोग नियन्त्रण महाशाखाले पुष्टि गरेको छ।  

 

महाशाखा प्रमुख डा विवेककुमार लालका अनुसार एच१एन१ भाइरसका कारण काठमाडौंमा १४, सिन्धुलीमा १, पोखरामा १ र काभ्रेमा १ जनाको ज्यान गएको छ। यस्तै एकजनाको ठेगाना खुलेको छैन। मौसमी रुघाखोकीले उनीहरूको मृत्यु भएको हो। पहिलोपटक सन् २००९ मा मेक्सिकोमा सुंगुर फार्ममा देखिएको स्वाइन फ्लु अहिलेसम्म संसारका २०० भन्दा बढी देशमा फैलिसकेको छ।

 

परीक्षणका क्रममा सुंगुरमा पाइने जिनजस्तो भाइरस मानिसमा पनि पत्ता लागेपछि यसलाई चिकित्सकले स्वाइन फ्लु भन्न थालेका हुन्। तर, नेपालमा सर्वसाधारण आतंकित हुने डरले एच१एन१ लाई सरकारी निकायले मौसमी रुघाखोकी भन्ने गरेका छन्। यो खबर आजको नयाँ पत्रिका दैनिकबाट लिइएको हो ।

स्वाइन फ्लु