समाचार राजनीति

'प्रहरीलाई अनुसन्धान गर्न बाटो खुलेको छ, महराकाे सभामुखमा पुनर्वहाली हुने सम्भावना छैन'

'प्रहरीलाई अनुसन्धान गर्न बाटो खुलेको छ, महराकाे सभामुखमा पुनर्वहाली हुने सम्भावना छैन'

काठमाडौं– निवर्तमान सभामुख कृष्णबहादुर महरा पुनर्वहाली हुने सम्भावना नरहेको बताउँदै संविधानविद्हरुले प्रहरीलाई अनुसन्धान गर्न प्रयाप्त प्रमाण रहेकाे बताएका छन्। बुधबार काठमाडौंमा आयोजित साक्षात्कार कार्यक्रममा नेपाल बार एशोसिएशनका महासचिव लिलामणी पौडेलले संसद सचिवालयकी कर्मचारीसँग यौन दुव्यवहार गरेको आरोप लागेका महरा सभामुख पदबाट मुक्त भएको उल्लेख गर्दै उनी पुनः सोही पदमा बहाली हुने सम्भावना नरहेको बताएका हुन्।

महासचिव पौडेलले सो प्रकरणमा पीडित भनिएकी रोशनी शाहीले बोली फेर्दैमा सो घटनाको अनुसन्धान प्रक्रिया नरोकिने पनि स्पष्ट पारे। उनले फौंजदारी कार्यविधि संहिता अनुसार पीडित भनिएकी शाहीले प्रहरीको हटलाईन सेवामा आफू पीडित भएको जानकारी गराएपछि प्रहरीलाई अनुसन्धान गर्न बाटो खुलेको पनि स्पष्ट पारे।

नेपाल बार एशोसिएशनका पूर्वउपाध्यक्ष टीकाराम भट्टराईले महरा प्रकरणको छानवीन प्रक्रिया नरोकिएपनि पीडित भनिएकी महिलाले अनुसन्धानमा नसघाए सो घटनाको सत्यतथ्य बाहिर आउन कठिनाई हुने बताए। उनले पीडित भनिएकी महिला शाहीले डिएनए परीक्षण गर्न नदिए अनुसन्धानका लागि निवर्तमान सभामुख महरालाई दोषी करार गर्न प्रमाण नपुग्ने तर्क पनि गरे।

कार्यक्रममा बोल्दै संविधानविद् डा. चन्द्रकान्त ज्ञवालीले महराले पदबाट राजीनामा दिएसँगै सभामुख पद रिक्त रहेको बताए। उनले सभामुख र उपसभामुख फरक दलको हुनुपर्ने संवैधानिक व्यवस्था अनुसार सभामुख पदको निर्वाचन हुनुपर्ने पनि बताए। संविधानले फरक दल र फरक लिंगलाई सभामुख र उपसभामुख हुनुपर्ने परिकल्पना गरेको उनको दावी छ। संविधानविद् ज्ञवालीले संविधानको परिकल्पना अनुसार दलहरुले सभामुखको निर्वाचन गराउँदा फरक दलका सभामुख र उपसभामुख बनाउनुको विकल्प नरहेको पनि बताए।

सभामुख महरा प्रकरण