समाज भिडियो कभर स्टोरी प्रविधि

महावीर पुनको सुझावः समृद्धि ल्याउने हो भने मैले देखाएको बाटो हिँड्नैपर्छ, अर्को उपाय छैन (भिडियो)

महावीर पुनका देश बदल्ने नयाँ अनुसन्धान योजना

महावीर पुनको सुझावः समृद्धि ल्याउने हो भने मैले देखाएको बाटो हिँड्नैपर्छ, अर्को उपाय छैन (भिडियो)

काठमाडौं । जीवनशैली एकदम अव्यवस्थित देखिने । आफ्नै लहडमा हिँड्न रुचाउने एक अनौठो पात्र हुन् महावीर पुन ।

 

कसैले उनलाई घमण्डी पनि भन्छन् । कसैले ‘लहडी’ठान्छन् । तर नेपाली समाजमा उनको योगदान र पहल प्रेरणादायी छ । उनका महत्वाकांक्षी योजना पूरा भएको दिन देश समृद्धिको लयमा पक्कै हिँड्नेछ ।

 

अमेरिकाको सानदार व्यक्तिगत जीवनशैली छोडेरै ‘बेरोजगार बन्न’ नेपाल फर्किएका पुनले जब आफ्नो जन्मथलो म्याग्दीको दुर्गम गाउँलाई उज्यालो बनाए त्यसपछि चिन्यो उनलाई संसारले ।


बिडम्वना त के भने, विश्व समुदायले उनको कामको प्रसंसा गरेपछि नै हो आम नेपालीले उनलाई ठम्याएको । तर औपचारिकताबाट नितान्त टाढा आफ्नै ‘मूड’मा केही खोजिरहे झैँ छन् महावीर ।

 

लाग्छ, उनी एक भव्य सपनाको पछि पछि एक्लै दगुरिरहेका छन् । त्यसो त, उनका योजना महत्वाकांक्षी छन् । म्याग्दीमा ईन्टरनेटपछि अनुसन्धान केन्द्रको स्थापनाको लागि अहोरात्र खटिरहेका महावीरले हालै ड्रोन निर्माण गरेका छन् । जुन अनुसन्धान केन्द्रकै एक ‘प्रोजेक्ट प्लान’ थियो ।


यसरी आयो आइडिया
 

कालिकोटका केही युवाले दुर्गम गाउँमा औषधि पुर्याउन अप्ठ्यारो भयो भनी गुनासो गरेपछि महावीरलाई यस्तो ‘आइडिया’आएको थियो ।

 

यसअघि पनि ड्रोनका ‘डमी’नबनेका होइनन् । तर महावीरले तयार पारेको ड्रोन औषधि बोक्न कामकाजी हुनेछ । यसकै लागि लक्षित गरी उनले ड्रोन तयार पारेका हुन् ।

 

तत्कालका लागि नमुना भए पनि व्यवसायीक रुपमै ड्रोन संचालन गराउने योजना छ उनको । खासगरी दुर्गम गाउँमा औषधि पुृर्याउन प्रयोग गर्ने भन्दै आगामी ६ महिनाभित्र अरु पनि ड्रोन बनाइरहेका छन् ।


समृद्धि समृद्धि सपना
 

अहिलेको वाम–सरकारले समृद्धि योजना घाषणा गर्नुअघि नै महावीर निरन्तर समृद्धि सपनालाई पछ्याउँदैआएका छन् । आम मान्छेको भीड भन्दा परै रहेर उनी आफ्नो टीम सहित यसको अभियानमा निरन्तर छन् ।

 

त्यसो त, समृद्धिको योजना सरकारले भने जस्तो सजिलो नभएको ठम्याइ छ उनको । ‘आर्थिक उन्नती नगरिकन समृद्धि शब्दले मात्रै पुग्दैन,’ उनी भन्छन्, ‘पहिले राज्यले पैसा कमाउनु पर्यो । यसको लागि ब्यापार गर्नु पर्यो । अनुसन्धान गर्नुपर्यो । यो सब काम गर्न युवा प्रतिभा विदेसिने क्रम रोकिनु पर्छ ।’

 

महावीर पुनको समृद्धिको आधार एउटै हो, युवा प्रतिभा र जनशक्ति देशमै बसेर काम गर्नुपर्छ । त्यसैको लागि पनि अनुसन्धान केन्द्रको ‘कन्सेप्ट’आएको बताउँछन् उनी ।


अरु योजना
 

पुनको नेतृत्वमा रहेको राष्ट्रिय अनुसन्धान केन्द्रले एकपछि अर्को अनुसन्धानका योजना ल्याउँदै छ । ड्रोनपछि पनि अरु थुप्रै योजना एकसाथ अघि बढिरहेको बताउँछन् पुन ।

 

उनका अनुसार निकट भविष्यमा यार्सागुम्भालाई प्रशोधन गर्ने र औषधि बनाउने उद्योगको तयारी हुनेछ । यस्तै तराईमा ‘इको फ्रेन्ड्ली’ टेम्पो लगायत योजनामाथि खोज भइरहेको छ ।

 

आखिर महावीर पुनको यस्तो ‘लहड’समृद्धिकै लागि समर्पित छ । राज्यले साथ नदिएपछि ५० करोड रकम संकलन गर्दै अनुसन्धान केन्द्र स्थापनाको महाअभियानमा जुटेको उनको संस्थाले ६ करोड संकलन गरिसकेको छ । देश र विदेशबाट थुप्रै युवाले उनलाई साथ दिएका छन् । महावीर आफ्नो टीमका साथ निरन्तर छन् समृद्धिको यात्रामा ।

 

नेपालआजको टीमले पछिल्लो साता ठमेलस्थित पुनकै रेष्टुरेण्टमा पुगेर गरेको भिडियो अन्तरवार्तामा आफ्ना योजनाबारे खुलेर ब्याख्या गरेका छन् ।

 

‘समृद्धि र विकास’को नारा दिँदैआएको सरकारलाई पनि उनले केही घतलाग्दा सुझाव दिएका छन् । उनी भन्छन्, ‘केपी ओलीले भन्नुभएको समृद्धिले मात्रै सम्भव छैन । त्यो भन्दा अगाडि देशको प्रतिभा यहीँ कामकाजी बनाउनुपर्छ । विश्वका समृद्ध मुलुक यहाँ पुगेको आफ्नै देशका प्रतिभा र जनशक्तिले गर्दा हो ।’

 

पुन आफूले भन्दैआएको समृद्धि र सरकारले भनेको समृद्धि–विकासमा भिन्नता रहेको बताउँछन् । अन्ततः अनुसन्धान, उत्पादन र ब्यापार जस्ता आर्थिक आधारमा टेकेरै समग्र समृद्धि सम्भव भएको उनको सुझाव छ ।

ड्रोन महावीर पुन