हाम्रो पात्रो विज्ञापन
ओटोमोबाइल

मापसे गरेर मोटरसाइकल चलाए स्टार्ट नै नहुने

मापसे गरेर मोटरसाइकल चलाए स्टार्ट नै नहुने

मादक पदार्थ सेवन  गरेर मोटरसइकल चलाउँदा स्टार्ट नै नहुने प्रविधिको पोखरामा सफल परीक्षण गरिएको छ । युवा आविष्कारक विकल्प ढुंगानाले मोटरसाइकल र स्कुटरका लागि नयाँ प्रविधिको आविष्कार गरेका हुन् ।

उनले हेलमेट नलगाएको र मापसे गरेको खण्डमा दुई पांग्रे सवारीसाधन आफैँ रोकिने वा स्टार्ट नै नहुने प्रविधिको आविष्कार गरेका ढुंगनाले दाबी गरे । उनले गरेको सफल परीक्षणलाई जिल्ला ट्राफिक प्रहरी कार्यालय कास्कीले समेत प्रमाणित गरिदिएको छट । एक हप्तासम्म विभिन्न चरणमा गरिएको परीक्षणले उनले भने जस्तै नतिजा दिएको ट्राफिक प्रहरी कार्यालयका असई राजेश थापाले बताए ।

उनको प्रविधिको जिल्ला ट्राफिक प्रहरी कार्यालय कास्कीका प्रमुख विश्वराज अधिकारीले औपचारिक रूपमै परीक्षण सफल भएको जनाएका हुन ।

ढुंगानाले आफ्नो साभाष नामक यो प्रविधिमा हेलमेटमा दुईथरी डिटेक्टरहरुको प्रयोग गरिएको बताए । उनको यो प्र्रविधिले सडक दुर्घटना न्युनीकरणमा उल्लेख्य भूमिका खेल्ने दाबी गरे ।

आफूले निर्माण गरेको प्रविधि मोटरसाइकल र स्कुटरमा जडान गर्दा करिब ७ हजार खर्च लाग्ने उनले बताए । “यो प्रविधिलाई धेरै सङ्ख्यामा हेलमेटसहित जडान गर्दा करिब ५ हजारमा खर्च लाग्छ ’, उनले भने ।

हेलमेटमा यो प्रविधि जडान भइसकेपछि हेलमेटबिना वा मापसे गरेको खण्डमा मोटरसाइकल र स्कुटरमा इन्डीकेटरले सङ्केत गरेर स्टार्ट नै नहुने प्रविधि आफूले जडान गर्ने उनले बताए ।

पोखरा मल्टीमोडेल कलेजका प्राचार्य कृष्ण केसीले विकल्प जस्ता प्रतिभाहरुलाई पलायन हुनबाट रोक्न सरकारीस्तरबाटै पहल हुनुपर्ने बताए ।

उता उक्त कलेजकै विज्ञान संकायका प्रमुख डा। चन्द्रबहादुर थापाले उनको प्रविधिलाई जनस्तरमा लैजान विस्तृत अध्ययन गर्नुपर्ने खाँचो औँल्याए । त्यस्तै राष्ट्रिय युवा परिषद् कास्कीका अध्यक्ष आशीर्वाद सुवेदीले ढुंगानालाई परिषदले आवश्यक सहयोग गर्ने प्रतिबद्धता व्यक्त गरे ।

गुरुचेला एजुकेशन नेटवर्कका कार्यकारी निर्देशक सुवास मल्लले पनि यस्ता प्रतिभाहरुलाई प्रवद्र्धन गर्न आफ्नो संस्था निरन्तर लाग्ने वचन दिए ।

तनहुँको मनपाङ घर भई विगत केही वर्षदेखि पोखरामा बस्दै आएका विकल्पले गत वर्षको युवा प्रतिभा पुरस्कार समेत प्राप्त गर्न सफल भएका छन् ।

उनले गृहजिल्ला तनहुँ र काठमाडौँ, पोखरा जस्ता ठाउँहरूमा समेत आफ्ना आविष्कारहरुको प्रदर्शनी गरिसकेका छन् । यसअघि नै उनले हेलिकोप्टर, बम डिस्पोजेबल रोबर्ट, भूकम्प सूचक यन्त्र, म्यानुयल लोडिङ्ग एण्ड लिफ्टिङ्ग रोबर्ट, घाँस काट्ने मेसिन, धान ठटाउने रोबर्ट र फुटबल खेल्ने रोबर्ट लगायत डेढ दर्जन यन्त्रहरुको आविष्कार गरिसकेका छन् ।