ज्ञान–विज्ञानका महापण्डित शंकराचार्य निश्चलानन्द सरस्वतीको नेपाल भ्रमण (विशेष)

  • बिहिबार, २७ बैशाख २०७५ गते मा प्रकाशित
ज्ञान–विज्ञानका महापण्डित शंकराचार्य निश्चलानन्द सरस्वतीको नेपाल भ्रमण (विशेष)

काठमाडौं । गोवर्द्धन  मठ–पुरीका पीठाधीश्वर श्रीमज्जगद्गुरु शंकराचार्य पुज्यपाद स्वामी निश्चलानन्द सरस्वतीजी महाराज नेपाल आउने भएपछि उहाँको स्वागत, अभिनन्दन समारोहकालागि आयोजक पक्षले तयारी तीव्र पारेको छ । 

 

शंकराचार्यको काठमाडौंको टुँडीखेलमा जेठ १ गते मंगलबार ११ः ३० बजे नागरिक अभिनन्द हुने भएको छ । अनन्त श्री विभूषित पूज्यपाद स्वामीजीले काठमाडौंमा पहिलोपटक धर्म–जीवन–दर्शनबारे प्रवचन पनि दिनेहुनु भएको छ । शंकराचार्य स्वागतार्थ मूल समितिले उहाँको अभिनन्दनमा सहभागी हुन सार्वजनिक आह्वान गरेको छ । 


शंकराचार्यको जेठ १ मा काठमाडौंमा नागरिक अभिनन्दन हुने भए पनि उहाँ दिल्लीबाट त्रिभुवन अन्तर्राष्ट्रिय विमानस्थलमा वैशाख ३० गते दिउँसो २ः ३० बजे अवतरण गर्नुहुनेछ । वैशाख ३१ गते दिउँसो ११ बजे उहाँले पशुपति क्षेत्र विकास कोषबाट हुने वनकाली हंसमण्डपमा अभिनन्दन समारोहमा सहभागी हुनुहुनेछ ।  जेठ १ गते दिउँसो ११ बजे टुँडिखेलमा नागरिक अभिनन्दन पछि सोही दिन साँझ ५ बजे अग्रवान भवनमा धार्मिक संगोष्ठीमा सहभागी हुनुहुनेछ । 

 

जेठ २ गते दिउँसो ११ः३० बजे त्रिभुवन विश्वविद्यालय सभाकक्षमा धार्मिक संगोष्ठी प्रश्नोत्तर कार्यक्रममा पनि शंकराचार्य सहभागी हुनुहुनेछ । सोही दिन साँझ पाँच बजे अगैवान भवनमा अनुगमन गोष्ठी र समिक्षामा सहभागी हुनुहुनेछ । 

जेठ ३ गते दिउँसो ११ बजे हवाईमार्गबाट चितवन प्रस्थान गर्नु हुनेछ । उहाँको आवास मनोकामना टोलमा हुनेछ । त्यस्तै गरी जेठ ४ गते ११ः ३० बजे उहाँको चितवनमा पनि नागरिक अभिनन्द हुनेछ । स्वामी शंकराचार्यले सोही दिन ४ बजे आध्यात्मिक संगोष्ठीमा प्रवचन दिनुहुनेछ । जेठ ६ गते वीरगञ्ज प्रस्थान गर्नु हुनेछ । जेठ ७ गते पनि उहाँको वीरगञ्जमा नागरिक अभिनन्दन हुनेछ । जेठ ८ गते रक्सौल हुँदो भारत प्रस्थान गर्ने कार्यक्रम तय भएको छ ।  

शंकराचार्यको नेपाल भ्रमणबारे मूल समितिको पत्रकार सम्मेलन

को हुन् निश्चलानन्द सरस्वती ? 
 

– गोवद्र्धन मठ–पुरी पीठाधीश्वर श्रीमज्जगद्गुरु पुज्यपाद शंकराचार्य स्वामी निश्चलानन्द ‘शंकराचार्य गुरु परम्परा’का १४५ औं शंकराचार्य हुनुहुन्छ । 
– उहाँ  सन् १९९२ देखि जगद्गुरु शंकराचार्य भएका हुनुहुन्छ । 

– उहाँ ज्ञान र विज्ञान दुवै विषयका ज्ञाता हुनुहुन्छ । 

–उहाँका १६१ विख्यात कृतिहरु प्रकाशित छन् । 

– अक्सफोर्ड र हावर्ड  विश्वविद्यालयका वैज्ञानिकहरुले उनीसँग पुरी–उडिसामा पुगेर वैदिक गणित विषयमा ज्ञान हासिल गर्ने गरेका छन् । 

–उहाँ सनातन सिद्धान्तका बारेमा सम्पूर्ण शुद्धतापूर्वक उद्भासित हुनुहुन्छ ।  

– नेपाल स्वतन्त्र रहे मात्र भारत स्वतन्त्र रहने हो, नेपालको सनातन मूल्य परम्परा जीवन्त रहे मात्रै भारतको सनातन मूल्य परम्परा जीवन्त रहन सक्ने हो भन्ने उनको महान विचार छ । 

 – उहाँका ग्रन्थहरुमध्ये शिवावतार, सार्वभौमिक सनातन सिद्धान्त, विश्वशान्तिका सनातन शिद्धान्त, बौद्ध सिद्धान्त र वेतान्त, गणित दर्शन, स्वस्तिक गणित, श्री गीतासुधा, श्री राधासुधा, गर्व से कहें हम हिन्दू हैं जस्ता विख्यात छन् । 


स्वागतको तयारी 

शंकराचार्यको स्वागतका लागि स्वागतार्थ मूल समारोह समिति गठन भएको छ । समितिको संयोजकमा काठमाडौं बत्तीसपुतलीस्थित बैंकटेश्वर मन्दिर देवस्थानका पीठाधीश्वर स्वामी पद्मधराचार्य तोकिनु भएको छ । मूल समारोह समितिले प्रचारप्रसार, मञ्च व्यवस्थापन, शंकाराचार्यको सवारी, आवास आदिको प्रबन्ध गरिरहेको छ । समितिले मंगलबार पत्रकार सम्मेलन गरेर पनि तयारीबारे औपचारिक जानकारी दिएको थियो । 

पूर्वराजा ज्ञानेन्द्र शाहलाई अभिनन्दन गर्ने क्रममा शाहको सम्मान ग्रहण गर्दैै शंकराचार्य ।

शंकराचार्य स्वागतार्थ मूल समारोह समिति

स्वामी पद्मधराचार्यः संयोजक 
हरिबोल भट्टराई    ः सहसंयोजक 
अस्मिता भण्डारी   ः सहसंयोजक 
नीलप्रसाद भण्डारी ः सहसंयोजक 
डा. रामचन्द्र अधिकारी ः सहसंयोजक 
किशोरी महतो       ः      सहसंयोजक 
अर्जुनप्रसाद बास्तोला  ः सहसंयोजक 

 

सल्लाहकार 
पुष्प पराजुली
 
सचिवालय सदस्य 
भरत पौडेल 
चक्रदेव जोशी 


श‌कराचार्य भ्रमणबारे पदाधिकारीहरुकाे विचार 

भरतकेशर सिंह, अध्यक्ष विश्व हिन्दु महासंघ अन्तर्राष्ट्रिय

 

गोवर्द्धन मठ–पुरी पीठाधीश्वर श्रीमज्जगद्गुरु पुज्यपाद शंकराचार्यको नेपाल आगमन धेरै अर्थमा महत्वपूर्ण छ । उहाँले नेपाल आउनुमा आफै पनि सबै हिन्दुहरुका लागि खुसीको कुरा हो । धार्मिक पर्यटनको दृष्टिले पनि महत्वपूर्ण छ । विश्व हिन्दु महासंघ अन्तर्राष्ट्रियसँगै अन्य २४–२५ वटा संस्थाहरु मिलेर उहाँको स्वागतका लागि काम गरिरहेको छ ।

शंकराचार्यज्यूलाई प्रधानमन्त्री केपी शर्मा ओली, पर्यटन मन्त्रालय र पशुपति विकास कोषले पनि निमन्त्रणा पठाएका हुन् । यसअर्थमा उहाँ राष्ट्रकै अतिथी भएर आउन लाग्नु भएको हो । उहाँको भ्रमण सफल पार्न विश्व हिन्दु महासंघ अन्तर्राष्ट्रियले पूरा गर्नु पर्ने दायित्व र कर्तव्य पूरा गरिरहेको छ । आफ्नो जिम्मेवारी र कर्तव्य अन्य संघ संस्था अनि सरकारले पनि पूरा गर्नुपर्छ । 

स्वामी पद्मधराचार्य, पीठाधीश्वर,  बैंकटेश्वर मन्दिर देवस्थान, काठमाडौं । 

 

नेपाल आउन लाग्नु भएका शंकराचार्य गुरु परम्पराका अविच्छिन्न शंकराचार्यहरुको १४५ औं प्रतिनिधि हुनुहुन्छ । उहाँको स्वागतका लागि धेरै संघसंस्था, सरकारी निकायले पनि काम गरिरहेको छ । म शंकराचार्य स्वागतार्थ मूल समारोह समितिको संयोजक पनि हुँ । यो समितिले उहाँको स्वागतका लागि विभिन्न तयारीहरु गरिरहेको छ । तयारी तीव्र छ । उहाँको नेपाल भ्रमण सुखद र सफल हुने विश्वास गरेको छु ।  

किशोरी महतोः संयोजक, मञ्च व्यवस्थापन तथा अनुगमन समिति 

 

२४ सय स्क्वाएर फिटको मञ्च टुँडीखेलमा बनाउँदैछौं । बनाउन थालेको चार दिनमा पूरा हुन्छ । त्यहाँ सात हजार स्क्वायएर फिटको वाटरप्रुफ पण्डाल पनि हुनेछ । टुँडीखेलमा ११ बजेदेखि ५ बजेसम्म कार्यक्रम हुन्छ । त्यसमा शंकराचार्यले डेढ घन्टा जति प्रवचन दिनुहुनेछ । विशिष्ट व्यक्तिहरुलाई पनि निमन्त्रणा गरेका छौं । 


बुद्धिमान तामाङ , उपाध्यक्ष, राप्रपा । 

 

शंकराचार्य भनेको को हो भन्ने बुझ्नु पर्छ  । आदि शंकराचार्य भनेको महाभारतको समयमा उहाँले जन्म लिनु भएको थियो । भगवान शंकरकै अवतारको रुपमा शंकराचार्यलाई बुझ्ने गरिन्छ । उहाँले चार स्थानमा पुजा गर्नुभएको थियो । त्यही भएर चार पीठका चार शंकराचार्य रहेका छन् । 


संसारमा धर्म नष्ट हुन थालेपछि, पापीहरु बढ्न थालेपछि धर्मले बाँध्नका लागि शंकराचार्यले जिम्मेवारी लिनुभएको थियो । अरुको अहित गर्नेहरुलाई धर्मको नियमले बाँधेर रोक्नका लागि भगवान शंकरले शंकराचार्य पठाउनु भएको हो । त्यो गुरु परम्पराको निरन्तरता नै अहिलेका शंकराचार्य हुनुहुन्छ । उहाँजस्तो मान्छे नेपाल आउनु भनेको हामी सबै नेपालीहरुका लागि ठूलो उत्सवको कुरा हो । 
९४ प्रतिशत ओमकार परिवारका मानिसहरु बस्ने देश हो नेपाल । यस्तो देशमा शंकराचार्य आउनु भनेको धेरै महत्वको कुरा हो । पश्चिमाहरुले हाम्रो देशको धर्म संस्कृति नष्ट गरिरहेको बेला धर्म गुरु आउनु र हिन्दु धर्मको संरक्षणका लागि योगदान दिनु धेरै नै ठूलो कुरा हो । 
 


अस्मिता भण्डारी, सहसंयोजक, शंकराचार्य स्वागतार्थ मूल समिति

 

हालको सरकार हिन्दुहरुको भोटले बनेको हो । वामपन्थी सरकार भए पनि, कम्युनिष्टहरुको सरकार भए पनि  हिन्दु धर्म मान्नेहरुले दिएको भोटबाट नै सरकार गठन भएको हो । यति भएर पनि वर्तमान सरकारले हिन्दु धर्मलाई उपेक्षा गरेको छ भन्न सक्दिनँ । किनभने प्रधानमन्त्रीको कार्यालयबाट समेत शंकराचार्यलाई निम्तोपत्र गएको छ । 


सरकारले समेत शंकराचार्यको मान गरेकै देखिन्छ । तर हेर्दा त्यस्तै देखिनु र वास्तवमै मान गर्नु फरक कुरा हो । शंकराचार्य आउन लाग्नु भएको विषयमा सरकारको ध्यान गएको देखेको छैन । हुन त भारतीय प्रधानमन्त्री नरेन्द्र मोदीजीको नेपाल भ्रमणका कारण पनि सरकारको ध्यान त्यता गएको होला । तर सरकारले एकजना मन्त्री वा सचिव तोकेर स्वामी शंकराचार्यको स्वागतका लागि, व्यवस्थापनका लागि काम दिन सक्थ्यो । त्यस्तो अनुभूति भइरहेको छैन । यस विषयमा सरकार गम्भीर हुन्छ भन्ने मैले आशा र विश्वास लिएकी छु ।