देश राजनीति

जेठ ३ गते नेकपाको एकता टुंगो 

जेठ ३ गते नेकपाको एकता टुंगो 

काठमाडौं । नेपाल कम्युनिस्ट पार्टी (नेकपा) ले पार्टीका तल्लो तहदेखि माथिसम्म सम्पूर्ण एकता टुङ्गोे लगाउने तयारी गरेको छ । जेठ ३ गतेको अवसर पारेर एकता हुन बाँकी स्थानीय निकाय, जिल्ला, प्रदेश, जनवर्गीय संगठन, विभाग, प्रवास लगायत सबैलाई टुंगो लगाउने तयारी भइरहेको नेकपाको सचिवालयले जनाएको छ । नेकपाका अध्यक्ष एवं प्रधानमन्त्री केपी शर्मा ओली भियतनाम भ्रमणमा जानुअघि बुधबार सचिवालयको बैठक बोलाएर एकता प्रक्रिया टुङ्गोे लगाउने विषयमा छलफल गरेका थिए । 

 

आउँदो जेठ ३ गते नेकपा गठन भएको एक वर्ष पूरा हुँदैछ । सोही अवसरमा सम्पूर्ण एकताको घोषणा गर्ने पुष्टि नेकपाका अर्का अध्यक्ष पुष्पकमल दाहाल ‘प्रचण्ड’ ले गरेका छन् । उनले प्रधानमन्त्री ओलीसँग बसेर एकताको विषयमा टुङ्गोे लगाइएको र अबको दुई चारदिन पछि घोषणा गरिने बताए । पोलिटब्युरो गठन तथा केन्द्रीय कार्यसमितिको कार्यविभाजन पनि सँगै हुने उनले स्पष्ट पारे  ।

 


अहिलेसम्म केन्द्रीय समिति, सचिवालय, स्थायी समिति, प्रदेश र जिल्लाको मात्र टुङ्गोे लागेको छ । केन्द्रीय समितिमा कार्यविभाजन हुन बाँकी छ भने प्रदेश र जिल्लामा कार्यसमितिको टुङ्गोे लाग्न बाँकी छ । जिल्लामा अध्यक्ष र सचिव तथा प्रदेशमा अध्यक्ष, इन्चार्ज, सहइन्चार्ज, सचिवको मात्र टुङ्गोे लागेको छ । पोलिटब्युरो गठन गर्न पनि बाँकी छ । यी सबै एकैपटक टुङ्ग्याउने तयारी सचिवालयले गरेको छ । स्थानीय तह र जिल्लाका अधिकांश एकता प्रक्रिया टुङ्ग्याइसकेको छ । कतिपय ठाउँमा शपथग्रहण समेत भइसकेको छ । कतिपय ठाउँमा प्रस्ताव तयार गरेर राखिएको छ भने कतिपय ठाउँमा स्थानीय तहको विवादका कारण जिल्लाको टुङ्गोे लागेको छैन ।


प्रदेश १ का इन्चार्ज देवराज घिमिरेले सबै जिल्लामा सहमति भइसकेको र मोरङमा महानगरपालिकाको विवाद रहेको कारण जिल्लाको टुङ्गोे नलागेको जानकारी दिए । अरु स्थानीय तह र जिल्लाको एकता प्रक्रिया लगभग टुङ्गोे लागि सकेको बताए । प्रदेश २ मा जिल्ला र स्थानीय तह सबै बाँकी रहेका छन् । बीचमा प्रदेश तथा जिल्ला इन्चार्ज हेरफेर हुँदा एकता प्रक्रिया प्रभावित भएको छ । प्रदेश २ का इन्चार्ज विश्वनाथ साहले यहाँका सबै स्थानीय तह बाँकी रहेका जानकारी दिए । जिल्लालाई चाँडो टुङ्गोे लगाउने अनि स्थानीय तहको टुङ्गोे लगाउने गरी छलफल शुरु भएको उहाँले स्पष्ट पारे ।


प्रदेश–३ मा एक हप्ताभित्र सबै एकीकरण टुङ्गोे लाग्ने बताइएको छ । प्रदेश–३ का इन्चार्ज नारायण दाहालका अनुसार पहिला जिल्लाको टुङ्गोे लाग्छ र त्यसपछि मात्र स्थानीय तहको टुङ्गोे लाग्छ । जिल्लाको कार्यसमिति बनाउने विषयमा लगभग सहमति भइसकेको छ र त्यसलाई अन्तिम रूप दिन मात्र बाँकी रहेको उनको भनाइ छ  । यो समाचार गोरखापत्र दैनिकबाट लिइएको हो ।

नेपाल कम्युनिस्ट पार्टी नेकपा एकता
ADVERTISEMENT

यस्ता छन् नेपाल टेलिकमका सस्ताे दरका डाटा प्याक योजना

नेपाल टेलिकमले सस्तो दरको भ्वाइस प्याक, डाटा प्याकलगायतका प्याक उपभोक्तालाई दिइरहेको छ। जसमा अल टाइम भ्वाइस प्याक, नाइट टाइम भ्वाइस प्याक, डे प्याक तथा विधिन्न किसिमका डाटा प्याकहरूका योजना रहेका छन्। योजनामा टेलिकमले एक अर्कामा असिमित रूपमा कल गर्नुका साथै थप डाटा, एसएमएस सुविधासमेत प्रयोग गर्न सकिने प्याकेजसमेत उपलब्ध गराइरहेको छ।