कभर स्टोरी भिडियो अर्थ अपराध सुरक्षा देश

धर्मको आडमा सरकारी जमिनमा मुठ्ठीभरको चलखेल 

धर्मको आडमा सरकारी जमिनमा मुठ्ठीभरको चलखेल 

“बागमती नदी करिडोर पनि रहेन सुरक्षित
सरकारी निकाय नै बन्यो मतियार”

   
सार्वजनिक जग्गा हडप्ने र कब्जा जमाउने प्रतिस्पर्धा बढ्दो छ ।  मानवीय भावनालाई हतियार बनाउँदै धार्मिक तथा सामाजिक कामको नाममा सार्वजनिक जग्गा कब्जामा लिने र त्यसलाई आफूखुसी व्यावसायिक प्रयोजनमा उपयोग गर्ने धन्दा आमरुपमा फस्टाएको छ । त्यसको पछिल्लो उदाहरण हो– शंखमूलस्थित आर्ट अफ लिभिङ्ग ।

 

बागमती कोरिडोरमा रहेको सार्वजनिक जग्गा प्रयोग गर्दै आर्ट अफ लिभिङ्गले आफ्नो प्रभाव जमाएको छ । अन्तर्राष्ट्रिय गैरनाफामूलक आध्यात्मिक संस्था भनिएको आर्ट अफ लिभिङ्गले बागमतीको सार्वजनिक जग्गा प्रयोग गर्दै आफ्नो क्रियाकलाप निर्वाध संचालन गरिरहेको छ । 


काठमाडौं महानगरपालिका वडा नं. १० स्थित बागमती कोरिडोरको झण्डै २४ रोपनी सार्वजनिक जग्गा यस सस्थाले भोगचलन गरिरहेको छ । सहरी विकास मन्त्रालय अन्तर्गत ‘अधिकार सम्पन्न बागमती सभ्यता एकिकृत विकास समिति’लाई प्रभावमा पार्दै यस संस्थाले उक्त सार्वजनिक जग्गा हात पारेको हो । यही सार्वजनिक जग्गामा आर्ट अफ लिभिङ्गले पक्की भवनका साथै योगा ध्यान पार्क निर्माण गरेको छ । 

 

सम्झौता एक, झेल अनेक

आर्ट अफ लिभिङ्गले बागमती कोरिडोरको सार्वजनिक जग्गामा पार्क निर्माण गर्ने र सर्वसाधारणलाई खुल्ला गर्ने भन्दै सरकारले चाहेको समयमा छाड्ने शर्तमा समितिसँग सम्झौता गरी जग्गा निःशुल्क लिएको हो । 

 

सार्वजनिक जग्गा तथा सरकारी सम्पतिको प्रयोग गर्दै सेवा भावमा काम गर्ने भनिएपनि उक्त संस्थाले सो क्षेत्र निजी प्रयोजनमा मात्र प्रयोग गर्दै आइरहेको छ । 

 

संस्थाले बनाएको पार्क सर्वसाधारण सबैका लागि नभएर संस्थाकै कर्मचारी र सदस्यहरुमा सीमित हुने गरेको छ । पार्कमा सधैजसो ताल्चा मारिएको हुन्छ । विहान बेलुका खोल्ने भनिएपनि कतिबेला खुल्छ भन्ने सूचना कतै छैन् । 


आर्ट अफ लिभिङका प्रशिक्षक तथा सेवक मदन पन्त भन्छन्, ‘स्कुल कलेजका विद्यार्थीहरु, बाहिरी मानिसहरुले फोहोर गर्ने, बिरुवा उखल्ने, फूल टिप्ने, हाँगा भाच्न थालेपछि हामीले ताला लगाउन थालेका हौं । बिहान बेलुका पार्क खुला हुन्छ । दिउँसो बन्द गर्छौं ।’

 

आर्ट अफ लिभिङ्गले सार्वजनिक जग्गामा स्थायी संरचनाको पक्की भवन बनाएको छ । जुन भवनमा संस्थाले धार्मिक तथा आध्यात्मिक क्रियाकलाप संचालन गर्दै आएको छ । जहाँ योगा तथा ध्यान सिकाइन्छ । जग्गा सार्वजनिक, संस्थाको उद्देश्य मानव सेवा । तर यहाँ आउने उपभोक्तासंग मोटो रकम असुली किन ? 


दैनिक सयौंको संख्यामा आउने यस्ता सर्वसाधारणबाट आर्ट अफ लिभिङ्गले मनग्य पैसा कुम्लाई रहेको छ । यस विषयमा अधिकार सम्पन्न बागमती सभ्यता विकास समितिका वृक्षारोपण विज्ञ रामदयाल यादव प्रशिक्षक र पार्क संरक्षणका लागि श्रोत व्यवस्थापनका लागि आफूहरुले नै पैसा उठाउने स्वीकृति दिएको बताउँछन् । 


‘योगा ध्यानका लागि प्रशिक्षकहरु बाहिरबाट ल्याउनु पर्ने र तिनिहरुको खाना, खाजा तथा बन्दोवस्तका लागि र पार्कको सुरक्षार्थ शुल्क उठाउनु परेको हो । त्यसका लागि हामीले नै सो संस्थालाई स्वीकृति दिएका हौं ।’


एक त सरकार सार्वजनिक जग्गा, अर्को तर्फ पैसा उठाउने अनुमति । सरकार अन्तर्गत रहेको बेग्लै प्रकृतिको काम गर्न खडा भएको एउटा समितिले पैसा उठाउने अनुमति दिने यो कानुनसम्मत पटक्कै देखिदैन् । 

 

अझ संस्थाले गरेको सम्झौतामा बागमतीको उक्त जग्गा कहिलेसम्म भोग चलन गर्न पाउने र कहिले छाड्नु पर्ने भन्ने समय सीमा समेत स्पष्ट खुलाइएको छैन । यदि सरकारले चाहेको र सम्झौता अनुसार काम नभएको पाइएमा मात्र भनेर विकल्प राखिएको छ । यस्तो काइते सम्झौताले उक्त संस्थाले लामो समयसम्मै राज गर्ने देखिन्छ । 


सार्वजनिक जग्गाको दुरुपयोग मात्र होइन यस संस्थाले धर्मकै नाममा सरकारी जग्गा कब्जा गर्ने रणनीति स्पष्ट बुझ्न सकिन्छ । 

 

यस्तै धर्मको खोलमा गुरु कमलनयन आचार्यले राष्ट्रिय निकुञ्ज कब्जा गरेर बसे । त्यसैगरी ओशो ध्यान केन्द्र तपोवनको नाममा नागारजुन राष्ट्रिय निकुञ्जको वन अतिक्रमण गरिरहेको छ । कतै आर्ट अफ लिभिङ्गको नियत पनि त्यही त हैन ?  



बागमती कोरिडोरमा रहेका सार्वजनिक जग्गा धेरै अतिक्रमण भएका छन् । आर्ट अफ लिभिङ्ग रहेकै क्षेत्रमा समेत धेरै क्षेत्रफलमा जग्गा अतिक्रमण भएका छन् । तिलगंगा आँखा अस्पतालदेखि थापाथली सम्मको क्षेत्रमा अतिक्रमण बढेको छ । सुकुम्बासी र धार्मिक संस्था तथा सेवा कर्महरुले बागमतीको जग्गा कब्जा गरेका छन् । तर यस विषयप्रति सकारको कुनै चासो छैन । कालान्तरमा यस विषयमा गम्भिर समस्या आउने  प्रष्ट छ । कतै आर्ट अफ लिभिङ्गको मनसाय पनि त्यही त होइन ? गम्भीर प्रश्न खडा गराएको छ । 


यो मात्र होइन आर्ट अफ लिभिङ्ग रहेकै जग्गामाथि अर्को धार्मिक संस्था ओम शान्तिले समेत सार्वजनिक जग्गामाथि आफ्नो पकड जमाउन सुरु गरिसकेको छ । यसले पनि बागमती कोरिडोरको सार्वजनिक जग्गामा पार्क तथा संरचना खडा गर्न शुरु गरिसकेको छ । अब यसले पनि सार्वजनिक सम्पतिमाथि आफ्नो मनपरी चलाउने निश्चित जस्तै छ । अनि यसरी नै क्रमशः सार्वजनिक जग्गा कब्जा गर्दै जाने हो भने  सरकारी सम्पतिको हालत के होला ?


अन्य क्षेत्रको भन्दा धार्मिक क्षेत्रको प्रभाव बढी हुन्छ । यसको महत्व र संवेदनशीलता मानवीय भावनासँग जोडिने हुँदा यसको प्रभाव मजबुत रहन्छ । र जुगांैजुगसम्म राज गरिरहन सक्छ । यसलाई ऐन, नियम र कानुनले समेत छुन नसक्ने हुन सक्छ । त्यसैले यसैको भावनात्मकतामा टेकेर आर्ट अफ लिभिङ्गले सार्वजनिक जग्गा कब्जा गर्न त खोजिएको छैन ? 



आर्ट अफ लिभिङ्ग
ADVERTISEMENT

यस्ता छन् नेपाल टेलिकमका सस्ताे दरका डाटा प्याक योजना

नेपाल टेलिकमले सस्तो दरको भ्वाइस प्याक, डाटा प्याकलगायतका प्याक उपभोक्तालाई दिइरहेको छ। जसमा अल टाइम भ्वाइस प्याक, नाइट टाइम भ्वाइस प्याक, डे प्याक तथा विधिन्न किसिमका डाटा प्याकहरूका योजना रहेका छन्। योजनामा टेलिकमले एक अर्कामा असिमित रूपमा कल गर्नुका साथै थप डाटा, एसएमएस सुविधासमेत प्रयोग गर्न सकिने प्याकेजसमेत उपलब्ध गराइरहेको छ।