कभर स्टोरी

पत्रिका पढेर धारणा बनाउँछन कांग्रेस नेताहरु, भीम रावल बोलेपछि कांग्रेसको आँखा खुल्यो

पत्रिका पढेर धारणा बनाउँछन कांग्रेस नेताहरु, भीम रावल बोलेपछि कांग्रेसको आँखा खुल्यो

कांग्रेस नेताहरुका बारेमा एउटा पुरानै टिप्पणी छ , ‘ कांग्रेसका नेताहरु अध्ययन गर्दैनन् । अन्टसन्ट बोल्छन्, गल्ति भए पछि गएर सच्याउँछन् । ’
 


पछिल्लो समय बिभिन्न राष्ट्रिय मुद्दामा कांग्रेसका नेताहरुको भूमिका र  उनीहरुका अभिव्यक्तिलाई हेर्ने हो भने कांग्रेसलाई मुलुकमा के भैरहेको छ भन्ने पनि थाहा छैन । मुलुकमा बिखण्डनको चर्को स्वर गुञ्जिएर सरकारले पृथकतावादी सीके राउतसंग ११ बुँदे सम्झौता गरिसक्दा पनि कांग्रेस बेखबर देखियो । 

 


नेत्रबिक्रम चन्द नेतृत्वको नेकपालाई सरकारले आपराधिक समूह घोषणा गरेर प्रतिबन्ध लगायो, कांग्रेसको आधिकारिक धारणा छैन । कांग्रेसका नेताहरु सामान्य प्रतिक्रिया मात्र दिइरहेका छन् । अर्थात, भनौ उनीहरु प्रतिक्रियाको राजनीतिक गरिरहेका छन् । 

 


हुँदाहुँदा सरकार र स्वतन्त्र मधेश गठवन्धनबीच भएको सहमतिलाई कांग्रेस नेताहरुले हतारहतारमा स्वागत गरे । स्वागत गर्नेमा सभापति शेरबहादुर देउवा र  वरिष्ठ नेता रामचन्द्र पौडेल पनि पर्छन् । अचम्म, स्वागत गरेको दुई दिन नबित्दै उनै देउवा, पौडेलसहित जिम्मेवार नेताहरु सोही सहमतिलाई ‘राष्ट्रघाती’ भन्न थालेका छन् । 


यो बिडम्बना हुनुमा कांग्रेस नेताहरुमा अध्ययन अनुसन्धानको कमी, सूचना संयन्त्र ध्वस्त हुनु, आपसमा समन्वय नहुनु तथा देश बिदेश भित्रको सम्र्पक सम्बन्ध केही नहुनु प्रष्ट हुन्छ । 

 


मुलुकको सबैभन्दा पुरानो गौरवमय इतिहास भएको पार्टीको हालत यस्तो छ । कांग्रेस नेता बिष्णु धितालका अनुसार कांग्रेसलाई  मुलुकभित्र के भैरहेको छ ? कस्ता किसिमका खेल भैरहेका छन् ?  अन्तर्राष्ट्रिय तत्वहरु कसरी घुसेका छन् ? आफूले के भूमिका निर्वाह गर्नुपर्ने हो ? लगायतका बिषयमा फिटिक्कै चिन्ता छैन । 

 


बिहान उठ्यो, पत्रिका हेर्यो । सोही बमोजिम धारणा बनायो, भाषण गर्यो । यही तालले गर्दा कांग्रेस कम्युनिष्टका एजेण्डामा हिंड्यो भनेर कांग्रेस भित्रै एकथरीले बर्षौदेखि फरक अभियान चलाइरहेका छन् । 

 

अहिले सभापति शेरबहादुर देउवा नै खत्तम भएको भन्दै एकथरीले ढोल पिटिरहेका छन् । तर, धिताल भन्छन्, ‘सभापतिलाई खुइल्याएर कांग्रेस बलियो हुँदैन, यो समय भनेको कांग्रेस एकीकृत भएर लोकतन्त्र सिध्याउन क्रियाशिल भएको सरकारबिरुद्ध लाग्नुपर्छ । ’

 


स्वतन्त्र मधेश गठवन्धनसंग भएको ११ बुँदे सहमतिका बारेमा अहिले पनि कांग्रेसका नेताहरुले गम्भीर अध्ययन नगरेको धितालको दाबी छ । नेकपा नेता भीम रावलले जब ११ बुँदेका केस्राकेस्रा केलाएर सार्वजनिक गरे त्यसपछि मात्रै कांग्रेस नेताहरुले चाल पाएको उनी बताउँछन् । ‘यो अल्छि र ठालु पाराले कांग्रेसले कहिलेसम्म चल्छ ?’ धिताल प्रश्न गर्छन् । 

 


पछिल्लो समय ५६ जिल्लाका सभापतिहरुले केन्द्रीय समितिको निर्णय उल्ट्याउन भनेर बिज्ञप्ती जारी गरेपनि अब त्यसलाई ठूलो मुद्दा बनाउन नहुने धितालको धारणा छ । उनी भन्छन्, ‘ महासमितिको सुझाव अनुसार नै केन्द्रीय समितिले बिधान संशोधन गर्नुपर्थ्र्यो, त्यो भएन, पुरानै प्रावधान राख्दा पनि केही बिग्रेको छैन । यसमा गलफत्ती गर्न जरुरी छैन । ’