समाचार प्रदेश ७

पहिरो खस्दा एकको मृत्यु, दुईजना घाइते

पहिरो खस्दा एकको मृत्यु, दुईजना घाइते

दार्चुला । जिल्लाको दुहुँ गाउँपालिका–३ स्थित निर्माणाधीन दार्चुला–तिङ्कर सडकको राताकाठामा पहिरो खस्दा एकजनाको ज्यान गएको छ । यस्तै, दुईजना घाइते भएका छन्। आज बिहान पहिरो खस्दा नौगाड गाउँपालिका–४ सिप्टीका ३९ वर्षीय रघुवीरसिंह धामीको घटनास्थलमै मृत्यु भएको प्रहरी नायब उपरीक्षक रवीन्द्र कठायतले जानकारी दिए । खलङ्गाबाट व्यास क्षेत्रमा भेडाबाख्रा लिएर जान लागेका धामी सडकमाथिबाट आएको पहिरोमा परेका थिए। नौगाड–४ का ३१ वर्षीय मानसिंह ठगुन्ना र वडा नं ३ का उधारो ठगुन्ना घाइते भएका छन्।

 

घाइते उधारोको टाउकोमा चोट लागेको जिल्ला अस्पतालका स्वास्थ्य सहायक डम्मरदत्त भट्टले जानकारी दिए। मानसिंहको हातमा चोट लागेको छ। दार्चुला–तिङ्कर सडकमा सोमबार विस्फोटक पदार्थ विस्फोटन गरिएको थियो। दिउँसो ओहोरदोहोरमा समस्या हुने भए पछि उनीहरु राति त्यही बाटो भएर व्यासतर्फ जाँदै थिए। दार्चुला–तिङ्कर सडक योजनाका इञ्जिनीयर दिनेश रैखोलाका अनुसार अहिले सो सडक चौडा पार्ने काम भइरहेको छ। राति पानी परेका कारण पहिरो खसेको अनुमान गरिएको छ।  

दार्चुला पहिरो