मुख्य समाचार

राजनीति

यी हुन् मन्त्रिपरिषद्का निर्णय

बिहिबार, २१ भदौ २०७५ गते प्रकाशित
- नेपाल आज

यी हुन् मन्त्रिपरिषद्का निर्णय


काठमाडौं । सरकारले सहुलियत कर्जाका लागि व्याज अनुदानसम्बन्धी एकीकृत कार्यविधि, २०७५ स्वीकृत गरेको छ । 

 

प्रधानमन्त्री तथा मन्त्रिपरिषद्को कार्यालय सिंहदरबारमा बिहीबार बसेको मन्त्रिपरिषद्को बैठकले निजामती सेवा पुरस्कार सम्बन्धमा समेत निणर्य गरेको युवा तथा खेलकुदमन्त्री जगतबहादुर विश्वकर्माले जानकारी दिए । 

 

त्यसैगरी बैठकले नेपालको ऊर्जा क्षमता तथा नवीकरणीय ऊर्जा प्रवद्र्धन दोस्रो चरणको कार्यक्रमका लागि जर्मन सरकारबाट प्राप्त हुने ३१ मिलियन युरो (करिब चार अर्ब नौ करोड रुपैयाँ) अनुदान सहायता रकम स्वीकृत गर्ने निर्णय गरेको छ । सो रकम लेखनाथ–दमौलीको २ सय २० केभी प्रसारण लाइन आयोजना कार्यान्वयनमा उपयोग गरिने पनि निर्णय गरिएको छ । 

 

‘आजको मन्त्रिपरिषद्को बैठकले मुक्त हलिया पुनःस्थापना समस्या समाधान समिति र मुक्त कमैया पुनःस्थापना समस्या समाधान आयोगलाई कायम राख्ने र यसै आर्थिक वर्षभित्र समस्या समाधान गरिसक्ने निर्णय गरेको छ’, मन्त्री विश्वकर्माले भने । 

 

सरकारले धनुषा जिल्लाको शहीदनगर नगरपालिका वडा नं ८ डुमरियामा निर्मित अस्पताल भवनबाट स्वास्थ्य उपचार सेवा सञ्चालन गर्ने गरी प्राथमिक तहको १५ शैय्याको अस्पताल स्थापना गर्न सैद्धान्तिक स्वीकृत दिने निणर्य गरेको छ । उक्त अस्पतालको नाम शहीद सूर्यनाथ यादव स्मृति अस्पताल शहीदनगर नगरपालिका धनुषामा कायम गर्ने पनि निर्णय गरिएको छ ।

 

मन्त्रिपरिषद्को बैठकले संयुक्त राष्ट्रसङ्घ शान्ति स्थापनार्थ साझा घोषणापत्र समर्थन गर्ने निर्णय गरेको मन्त्री विश्वकर्माले जानकारी दिए ।