समाचार

प्रदेश ३

चीनद्वारा कामपालाई दुई वटा ब्रुमर प्रदान

सोमबार, १४ साउन २०७५ गते प्रकाशित
- नेपाल आज

चीनद्वारा कामपालाई दुई वटा ब्रुमर प्रदान

काठमाडौं । वातावरणीय सुधारका लागि काठमाडौं महानगरपालिकालाई चीनको छेङ्दु नगरले दुई वटा ब्रुमर प्रदान गरेको छ । 

 

चीनको छेङ्दु नगरका प्रतिनिधि वाङ ग्वाङ्लियाङले कामपा वातावरण महाशाखा प्रमुख हरि कुँवरलाई सडक सफाइमा प्रयोग हुने

दुई वटा ब्रुमरको साँचो आइतबार हस्तानान्तरण गरेको हो । 

नेपाल र चीनको समृद्धिका लागि गैरसरकारी संस्थाको परिचालनबाट सामाजिक परिवर्तन गर्ने सम्बन्धमा यहाँ भएको तीनवर्षे सहमतिपत्र हस्ताक्षर कार्यक्रममा उक्त साँचो प्रदान गरिएको हो ।

 

सहमतिपत्रमा नेपालका तर्फबाट समाज कल्याण परिषद्का सदस्य सचिव डिल्लीप्रसाद भट्ट र चीनका तर्फबाट चाइना एनजिओ नेटवर्क फर इन्टरनेसनल एक्सचेन्जका सदस्य सचिव जु रुईले हस्ताक्षर गरेका थिए ।

 

सो अवसरमा नेपालका लागि चीनका राजदूत यु होङ्लगायत उच्च अधिकारी तथा चीनका गैरसरकारी संस्थाका प्रतिनिधिको सहभागिता थियो । 

छेङ्दुले महानगरलाई दिने ब्रुमर युरो मापदण्ड ४ का हुन् । बु्रमरको लम्बाइ आठ दशमलव छ मिटर र चौडाइ तीन दशमलव पाँच मिटरको छ । १५ दशमलव आठ मेट्रिक टन तौल भएका उक्त ब्रुमर डिजेलले चल्ने बताइएको छ ।

 

धुलो पात पतिङ्कर संकलन गर्न प्रयोग गर्न सकिने उक्त ब्रुमरको सात घनमिटर धुलो संकलन र सात घनमिटर पानी बोक्ने क्षमता छ । 

सडक सफाइ गर्दा पहिले पानी छर्केर धुलो नउड्ने बनाएपछि धुलो तथा पतिङ्गर तान्ने छ । ९८ किमी प्रतिघण्टा गति भएको यसले, सडकको अवस्था हेरी प्रतिघण्टा तीन किमीदेखि २० किमीसम्म सडक सफा गर्न सक्नेछ । 

०७२ को भूकम्पबाट क्षति पुगेको वसन्तुपरको नौतले दरबार पुनःनिर्माणमा चीन सरकारले काम गरिरहेको छ । आजभन्दा ४५ वर्ष अगाडि चीन सरकारले निर्माण गरिदिएको चक्रपथ अहिले पनि चीन सरकारले नै विस्तार गरिरहेको छ । 

गत वर्ष काठमाडौं महानगरमा जनप्रतिनिधि आएपछि पहिलो कामका रुपमा सफा सहर रहेको थियो । सोही कार्यको सार्थकताका लागि चीनले कामपालाई उक्त फोहर सफा गर्ने उपकरण दिने तयारी गरेको हो । उक्त उपकरण आगामाी दुई महिनामा काठमाडौं आइपुग्ने पनि कामपाले जनाएको छ । 

अन्य पाँच ब्रुमर पनि ल्याउनका लागि खरिदको तयारी भइरहेको कामपाले सो अवसरमा जानकारी दिइयो ।