खेल

विश्वकप फुटबल : सेमिफाइनलमा युरोपका चार टोली भिड्दै

मङ्गलबार, २६ असार २०७५ गते प्रकाशित
- नेपाल अाज(PO)

विश्वकप फुटबल : सेमिफाइनलमा युरोपका चार टोली भिड्दै

काठमाडौं ।  रुसमा जारी २१ औँ संस्करणको फिफा विश्वकप २०१८ को सेमिफाइनल खेल आज राति देखि सुरु हुदैँछ । विश्वकपको सेमिफाइनलमा युरोपका चार टोलीले प्रतिस्पर्धा गर्दैछन् ।

 

आज राति हुने पहिलो सेमीफाइनलमा फ्रान्स बेल्जियम भिड्ने छन । खेल नेपाली समय अनुसार राति पौने १२ बजे सुरु हुने छ । क्वार्टरफाइनलमा फ्रान्सले उरुग्वेलाई सून्यका विरुद्ध दुई गोलले र बेल्जियमले पाँच पटकको विश्वकप विजेता ब्राजिललाई २–१ गोलअन्तरले पाखा लगाउँदै अन्तिम चारमा आफ्नो स्थान सुरक्षित गरेको हो ।

 विश्वकप फुटबलमा बेल्जियमले अहिलेसम्म फाइनलमा स्थान बनाउन सकेको छैन । तर अहिले सर्वाधिक अपेक्षा गरिएको गोल्डेन जेनेरेसन भएकाले बेल्जियमलाई यसपटक उपाधिको बलियो दाबेदार टिमका रुपमा हेरिएको छ । पछिल्ला २४ खेलसम्म अपराजित रहेको बेल्जियमका लागि अब विश्वकप उपाधि दुइ जित टाढा छ ।

 

यस्तै फ्रान्सले विश्वकपको समूह चरणबाट सेमिफाइनलसम्म पुग्दा एकैनासको प्रदर्शन गर्न सकेको छैन । तर नकआउट चरणमा प्रिक्वार्टरफाइनलमा अर्जेन्टिनासँग उत्कृष्ट प्रर्दशन गरे पनि उरुग्वेविरुद्धको खेलमा फ्रान्सको सोही लय देखिएन । दुई यरोपियन टिमले एक–अर्काविरुद्ध धेरै पटक प्रतिस्पर्धा गरेका छन् । ७३ पटक भिड्दा फ्रान्सले २४ पटक जित निकालेको छ । बेल्जियमले ३० पटक फ्रान्सलाइ हराएको छ । यी दुईबीच १९ खेल बराबरीमा टुङ्गिएका छन् । विश्वकपमा भने यी दुईले ६ पटक प्रतिस्पर्धा गरेका छन् । 

पछिल्लो समय १९८६ यता दुई टिमले विश्वकपमा प्रतिस्पर्धा गरेका छैनन् । त्यसबेला फ्रान्सले बेल्जियमलाई ४–२ ले पराजित गरेको थियो । यी दुई टिमबीच पछिल्लो पटक २०१५ मा भएको मैत्रीपूर्ण खेलमा बेल्जियम ४–३ ले विजयी भएको थियो । विश्वकप प्रतियोगिता अन्तर्गत बुधबार राति पौने १२ बजे इङ्ल्याण्ड र क्रोएसिया आमने सामने हुनेछन् । इंङ्ल्याण्डले स्वीडेनलाई २–० तथा क्रोएशियाले रुसलाई पेनाल्टी सूटआउटमा ४–३ गोल अन्तरले पराजित गर्दै अन्तिम चारमा स्थान सुरक्षीत गरेका हुन् ।