प्रवास

नेपाल सरकारको ध्यानाकर्षण गराईरहेको छु : अध्यक्ष भट्ट

बुधबार, १३ असार २०७५ गते प्रकाशित
- नेपाल आज

नेपाल सरकारको ध्यानाकर्षण गराईरहेको  छु : अध्यक्ष भट्ट

क्यानडा (टोरोन्टो) । नेपालको संविधान प्रवासी नेपाली मैत्री बनाउन क्यानडामा बसोबास गर्ने नेपालीहरुले आग्रह गरेका छन् । एनआरएन क्यानडाका पदाधिकारीहरुले हालै एनआरएन ग्लोबलका अध्यक्ष भवन भट्टसँगको भेटका क्रममा नेपाल सरकारलाई झक्झक्याइरहन अनुरोध गरेका हुन् । 

 

प्रवासी नेपालीहरु लागि नेपालमा सम्पत्ति किनबेचको अधिकार, नागरिक सरहको अधिकारलगायत विषय उठाउँदै आएका छन् । क्यानडा भ्रमणमा रहेका एनआरएन ग्लोबलका अध्यक्ष भवन भट्टसँगको एनआरएन क्यानडाका पदाधिकारीले भेटेर कुराकानी गरेका छन् । 

 

एनआरएन क्यानडाका अध्यक्ष गोपिकृष्ण काफ्ले, महासचिव चिरञ्जीवी घिमिरेलगायत पदाधिकारीले भट्टसँग छलफल गरेका थिए । छलफलका क्रममा अध्यक्ष भट्टले नेपाल सरकारसँग आफूले कुरा गरिरहेको र प्रवासी नेपालीको माग पूरा हुनेमा आशावादी रहेको जानकारी दिए । 

 

नागरिक सरहको अधिकार दिने सवालमा नेपाल सरकारले चाँडै छुट्टै ऐन बनाउनेमा आफू आशावादी रहेको उनले बताए । नेपाल सरकारलाई एनआरएन ग्लोबलको तर्फबाट घचघच्याउने काम भइरहेको उनले बताए । 

 

नेपालको दुर्गम जिल्ला जुम्लामा सुलभ मूल्यमा एअर एम्बुलेन्स सञ्चालन गर्न एनआरएन ग्लोबलले तयारी गरिरहेको अध्यक्ष भट्टले सो अवसरमा जानकारी दिए । कार्यक्रममा रोटरी क्लब नेपालका प्रतिनिधिहरुको पनि सहभागिता थियो ।