मुख्य समाचार

राजनीति

सत्तापक्षले दुई तिहाइ जुटाएर प्रत्यक्ष कार्यकारीकाे कुरा गर्नु गम्भिर शंकाकाे विषयः पाैडेल

मङ्गलबार, २९ जेठ २०७५ गते प्रकाशित
- नेपाल आज (LB)

सत्तापक्षले दुई तिहाइ जुटाएर प्रत्यक्ष कार्यकारीकाे कुरा गर्नु गम्भिर शंकाकाे विषयः पाैडेल

काठमाडौं । नेपाली कांग्रेसका वरिष्ठ नेता रामचन्द्र पौडेलले शैलजा आचार्यले गरेको निष्ठाको राजनीतिक सबैका लागि अनुकरणीय भएको बताएका छन्।

 

शैलजा आचार्य आदर्श समाजले शैलजा आचार्यको नवौँ स्मृति दिवसका अवसरमा मंगलबार आयोजना गरेको कार्यक्रममा उनले भने, “ आचार्य विद्रोही स्वभावको व्यक्ति हुनुहुन्थ्यो, विद्रोही स्वभावका कारण विसं २०१७ मा राजा महेन्द्रलाई कालो झण्डा देखाउँदा जेल बस्नुभयो, उहाँको विद्रोही स्वभाव अन्तिम कालखण्डसम्म कायम रह्रयो।” 

 

अर्को प्रसङ्गमा उनले सिद्धान्त र संगठन भएको कांग्रेस सिद्धान्तले जिते पनि संगठनले हार्दा यो अवस्थामा आएको बताउँदै पार्टी सभापतिलाई गुटको नेताभन्दा सिंगो पार्टीको नेता हुन सुझाव दिए।

 

वरिष्ठ नेता पौडेलले सरकारले दुई तिहाइको समर्थन जुटाउनु र सत्ता पक्षबाटै प्रत्यक्ष कार्यकारी राष्ट्रपतिको कुरा गर्नुले गम्भीर आशंका पैदा गरेको पनि बताए। 

 

यस्तै कांग्रेस केन्द्रीय सदस्य डा. शेखर कोइरालाले सरकार अधिनायकवादतर्फ अगाडि बढेको भन्दै उक्त कुरालाई रोक्न कांग्रेस दह्रो रुपमा उभिनुपर्ने बताए। “बालकृष्ण ढुंगेललाई आम माफी दिनुले न्यायपालिका र कार्यपालिकाबीचको गठजोड त छैन भन्ने आशंका पैदा भएको छ”, उनले भने।

 

समाजका अध्यक्ष दुर्गा घिमिरे, काठमाडौं महानगरपालिका उपप्रमुख हरिप्रभा खड्गी, पत्रकार पुरुषोत्तम दाहाललगायतले नेपालमा महिला अधिकार स्थापनाका लागि आचार्यले महत्वपूर्ण भूमिका खेलेको उल्लेख गरेका थिए। 

 

विसं २००१ मा मोरङमा जन्मिएकी आचार्य २०४८-२०५१ सालमा मोरङबाट प्रतिनिधिसभामा निर्वाचित भएकी थिइन्। विस २०५३ मा उपप्रधानमन्त्रीसमेत बनेकी उनको विसं २०६७ मा काठमाडौंमा निधन भएको थियो।