मनोरञ्जन

मुख्य समाचार

लगातार १२६ घण्टा नृत्य गरी विश्व कीर्तिमान राख्ने तयारीमा नेपाली चेली बन्दना

सोमबार, १९ कार्तिक २०७५ गते प्रकाशित
- नेपाल आज

लगातार १२६ घण्टा नृत्य गरी विश्व कीर्तिमान राख्ने तयारीमा नेपाली चेली बन्दना

काठमाडौंसुन्दा प्रायः असम्भव लाग्ने क्रियाकलापमार्फत विश्व कीर्तिमान राख्ने नेपालीको संख्या दिनप्रतिदिन बढ्दो छ ।

 

हालसम्म विभिन्न विधामा १२८ नेपालीले विश्व कीर्तिमान कायम गरिसकेको गिनिज बुक अफ वर्ल्ड रेकडर्सको तथ्यांकले देखाएको छ । यसै सिलसिलामा धनकुटाको मूर्तिढुंगा गाविस हाल महालक्ष्मी नगरपालिका९ की १७ वर्षीय बन्दना नेपाल लगातार १२६ घण्टा लोक नृत्य प्रस्तुत गरेर विश्व कीर्तिमान राख्ने तयारीमा लागेकी छन् ।

 

यसअघि लगातार १२३ घण्टा १५ मिनेट शास्त्रीय संगीतमा नृत्य गरेर भारत केरलाकी कलामण्डलम हेमलथाको नाममा विश्व कीर्तिमान कायम भएको थियो । आगामी मङ्सिर ७ गते बिहान ७ बजेदेखि बत्तीसपुतलीस्थित बिग फुडल्याण्डमा आफूले नृत्य शुरु गर्ने बन्दनाले बताइन्। उनले नेपालका विभिन्न मौलिक पहिरन र वेशभूषामा मारुनी, नौमती बाजादेखि सुदूरपश्चिमको देउडा गीतमा नृत्य प्रस्तुत गर्ने छिन् ।

 

युवापुस्तामा विदेशी संस्कृतिको बढ्दो मोह र नेपाली मौलिक लोक गीत तथा लोकसंगीतप्रति उत्साह जगाउन आफ्नो नृत्य महत्वपूर्ण हुने बताउँदै उनले भनिन्, 'हालसम्म सांस्कृतिक नृत्यमा विश्वमा कसैले पनि कीर्तिमान नराखेकाले मेरो सांस्कृतिक नृत्य विश्वमै पहिलो कीर्तिमान हुनेछ । लोक नृत्यका माध्यमबाट नेपाललाई विश्वमा चिनाउन आफूले साहस गरेको हो ।'

 

गीत, संगीतमा सानैदेखि रुची राख्ने बन्दनाले आफ्नै घरमा नृत्य प्रशिक्षण केन्द्र सञ्चालन गरेर नृत्य सिकाइ राखेकी छन् । उनले २०७३ सालमा शिवकैलाश कला केन्द्रबाट एक र भारतको बैंगलोरबाट दुई महिनाको नृत्य प्रशिक्षण कक्षा लिएकी थिइन्।