समाचार

समाज

देश

ट्राफिक प्रहरीको -यापिड स्क्वाड अभियान 

बुधबार, २४ असोज २०७५ गते प्रकाशित
- नेपाल आज

ट्राफिक प्रहरीको -यापिड स्क्वाड अभियान 

काठमाडौं ।  महानगरीय ट्राफिक प्रहरी महाशाखाले उपत्यकाको शान्तिसुरक्षा र ट्राफिक व्यवस्थापनलाई सहज बनाउन ‘ट्राफिक -यापिड स्क्वाड’ अभियान सञ्चालनमा ल्याएको छ । 

 

महाशाखाले उपत्यकाको ट्राफिक व्यवस्थापनमा सुधार ल्याउन र बढ्दो सवारी दुर्घटनालाई न्यूनीकरण गर्न र सडक अनुसाशनलाई अभिवृद्धि गर्न चाडवाडको समय पारेर उक्त अभियान सञ्चालनमा ल्याएको हो । 

 

चाडबाडको समयमा उपत्यकाका भित्री सडकमा धेरै सवारी जाम हुनाका साथै चोरीका समेत घटना बढ्ने भएकाले त्यस्तो घटना हुन नदिन तथा तत्काल घटनास्थलसम्म पुगेर आवश्यक काम कारवाही गर्न उक्त अभियान सञ्चालन गरिएको महाशाखाका प्रमुख वसन्तकुमार पन्तले जानकारी दिए । 

 

प्रत्येक दिन ५५ वटा मोटरसाइकलमा नेपाल प्रहरीका ५५ र ट्राफिक प्रहरीका ५५ प्रहरीलाई परिचालन हुनेछन् । उपत्यकालाई १० क्षेत्रमा विभाजन गरी जनशक्ति खटाइएको छ । जसमध्ये काठमाडौं ६, भक्तपुर दुई र ललितपुरमा दुई सेक्टर बनाएर परिचालन गरिएको पन्तले बताए । 

 

फ्लोसेन्ट जकेट लगाएर मोटरसाइकलमा हिँड्ने प्रहरीले कलम, कपी, क्यामरा, टर्च लाइट, सञ्चार सेट बोक्नुपर्नेछ । जसले घटनाका बारेमा सम्पूर्ण विवरण अनुसन्धानमा सहयोग पुग्नेछ । 

 

प्रहरी महानिरीक्षक सर्वेन्द्र खनालले अभियानको शुभारम्भ गरे । उनले भने, ‘प्रहरी जनताको सेवा गर्ने निकाय भएकाले लोभलालचमा नपरी जनतालाई सेवा दिन र नतिजामुखी भएर काम गर्नुहोस्, प्रहरी भएर बदमासी गर्न पाइँदैन, बदमासी गर्ने व्यक्ति प्रहरीभित्र बस्न पाउँदैन । ’ 

 

महाशाखाबाट सञ्चालन हुने उक्त अभियान शुरुलाई एक महीनाका लागि सञ्चालन हुनेछ । यसको आवश्यकता र प्रभावकारीतालाई हेरेर आगामी दिनमा सेवा विस्तार गर्दै लैजाने महाशाखाले जनाएको छ ।