पर्यटन

निकुञ्ज पर्यटकको संख्यामा न्यून वृद्धि

आइतबार, १४ माघ २०७४ गते प्रकाशित
- Bishow

निकुञ्ज पर्यटकको संख्यामा न्यून वृद्धि

चितवन । चितवन राष्ट्रिय निकुञ्ज भित्रने पर्यटकको संख्यामा आशातित् वृद्धि नभएको तथ्यांकले देखाएको छ । चालू आर्थिक वर्षको छ महिनामा गत आवको छ महिनामा भन्दा न्यून संख्याले मात्रै पर्यटक वृद्धि भएको पाइएको हो ।

 

निकुञ्जले उपलब्ध गराएको तथ्यांकअनुसार चालु आवको छ महिनामा विदेशी ४६ हजार ७८९, सार्क मुलुकका सात हजार ४४ र नेपाली १३ हजार २९० गरी ६७ हजार १२३ पर्यटक निकुञ्ज प्रवेश गरेका छन् । गत आवको सोही अवधिमा ६३ हजार ८०५ पर्यटक निकुञ्ज प्रवेश गरेका थिए । गत आवको छ महिनामा भन्दा चालू आवको सोही अवधिमा तीन हजार ३१८ पर्यटक वृद्धि भएको हो ।

 

चालु आवमा विदेशी ८७ हजार १९०, सार्कका १५ हजार ८७९ र नेपाली ३६ हजार ५६ गरी एक लाख ३९ हजार १२५ पर्यटक निकुञ्ज घुमेको तथ्यांकले देखाएको छ । आव २०७२-७३ मा भने ५१ हजार ५९३ विदेशी, छ हजार ६०६ सार्क र ३० हजार ५९२ नेपाली गरी ८७ हजार ३९१ पर्यटकले निकुञ्ज घुमेको कार्यालयले जनाएको छ ।

 

निकुञ्जका सूचना अधिकारी नुरेन्द्र अर्यालले बाढीका कारण आशातीत पर्यटक निकुञ्ज नभित्रिएको बताए । उनले गतवर्षको भदौमा मात्रै निकुञ्जमा छ हजार २३ पर्यटक भित्रिए पनि यसवर्षको भदौमा तीन हजार ८५९ पर्यटकमात्रै भित्रिएको बताए । यस वर्षको साउन अन्तिम साता राप्ती र बूढी राप्तीमा बाढी आउँदा पर्यटकीय क्षेत्र सौराहाका अधिकांश होटल डुबानमा परेका थिए भने राप्ती किनारका रेष्टुरेन्ट बगाएका थिए ।

 

निकुञ्जमा चालू आवमा एक लाख ५० हजार पर्यटक भित्रिने अपेक्षा गरिएको अर्यालले बताए । सशस्त्र द्वन्द्वका बेलामा निकै घटेको पर्यटकको संख्या क्रमशः उकालो लाग्दै जाँदा २०७२ सालमा आएको भूकम्प र त्यसपछिको नाकाबन्दीका कारण निकै प्रभावित भएको क्षेत्रीय होटल संघ जिल्ला अध्यक्ष सुमन घिमिरेले बताए । पछिल्लो समय नारायणगढ–मुग्लिन सडकखण्ड विस्तारका कारण यातायात असहज हुँदा पनि पर्यटन क्षेत्र प्रभावित भएको उनले जानकारी दिए । बाढीको समयमा तत्काल आउने पर्यटक घटे पनि त्यसपछि आउने पर्यटकलाई भने कुनै प्रभाव नपरेको अध्यक्ष घिमिरेले बताए ।

 

चितवनको पर्यटकीय क्षेत्र घुम्न आएर पनि निकुञ्ज प्रवेश नगर्ने पर्यटकको संख्या पनि उल्लेख्य हुने गर्छ । घिमिरेका अनुसार करिब ३० प्रतिशत पर्यटक सौराहा क्षेत्रमा आएर पनि निकुञ्जभित्र प्रवेश गरेका हुँदैनन् । दैनिक भ्रमण आउने विद्यार्थी, गोष्ठी, सेमिनारलगायत कार्यक्रममा आउने आन्तरिक पर्यटक निकुञ्ज प्रवेश नगर्ने गरेको पाइन्छ । जिल्ला हुँदै आवतजावत गर्ने व्यक्ति पनि एकरातका लागि सौराहा बस्ने गरे पनि उनीहरुले निकुञ्ज प्रवेशको कुनै पनि टिकट नकाट्ने हुँदा निकुञ्जको तथ्यांकमा समावेश हुँदैन ।