स्वास्थ्य

औषधि आयातमा रोक लगाउने सरकारी निर्णयको स्वागत

मङ्गलबार, ०९ जेठ २०७४ गते मा प्रकाशित

medicine

काठमाडाैँः नेपाल उद्योग वाणिज्य महासङ्घ, नेपाल उद्योग परिसङ्घ, नेपाल औषधि उत्पादक सङ्घ र नेपाल आयुर्वेदिक औषधि उत्पादक सङ्घले आत्मनिर्भर भइसकेका औषधि आयातमा रोक लगाउने सरकारी निर्णयको स्वागत गरेका छन् ।

राजधानीमा सोमबार आयोजित पत्रकार सम्मेलनमा नेपाल उद्योग वाणिज्य महासङ्घका उपाध्यक्ष उमेशलाल श्रेष्ठले नेपाली औषधि उद्योगलाई सरकारी नीतिले ठूलो राहत पुगेको बताए । रुघाखोकी, आऊ, औलो ज्वरो, झाडापखला, मुटु बाथरोग एवम् अन्य ३७ प्रकारका रोगको औषधि स्वदेशमा उत्पादन हुन सक्ने भएपछि सरकारले उक्त औषधि आयातमा रोक लगाउने भएको हो ।

नेपालमा भारतबाट मात्र ५२ प्रतिशत औषधि आयात हुन्छ । भने अन्य मुलुकबाट तीन र नेपालमा ४५ प्रतिशत औषधि उत्पादन हुन्छ । स्वदेशमा उत्पादन हुने अधिकांश औषधिको कच्चापदार्थ भारतबाट आयात हुन्छ ।

नेपाल औषधि उत्पादक सङ्घका अध्यक्ष शङ्कर घिमिरेले बैंकको व्याज, कर्मचारीको पारिश्रमिक, घरभाडा, कर तथा अन्य खर्च कटाएर औषधि कम्पनीले १५ प्रतिशत मात्रै नाफा आर्जन गर्ने गरेको बताए ।

नेपालमा ५५ औषधि उत्पादक कम्पनीमध्ये ४९ वटा सञ्चालनमा आएका र त्यसमा रु २६ अर्बको लगानी एवम् वार्षिक १६ अर्ब बराबरको औषधि उत्पादन हुँदै आएको छ । नेपालमा औषधि उत्पादन हुन थालेको ३५ वर्ष पुगेको छ भने यस क्षेत्रमा करिब १५ हजारले रोजगारी पाएका छन् ।