वर्ल्ड

रुसको संलग्नताको विवादले देश विभाजित भइरहेको छ - राष्ट्रपति ट्रम्प

शनिबार, ०६ जेठ २०७४ गते मा प्रकाशित

Donald Trump

वासिङटनः अमेरिकी राष्ट्रपति डोनल्ड ट्रम्पले आफ्नो चुनावी अभियानका क्रममा रुसको संलग्नताका बारेमा भइरहेको विवादले देशलाई विभाजित बनाइरहेको टीप्पणी गरेका छन् । उनले रुससँग आफ्नो कुनै सम्बन्ध नरहेको दोहोर्‍याउँदै पक्ष र विपक्षमा मत विभाजन हुँदा मुलुकलाई फाइदा नहुने बताए ।

वासिङटनमा भएको पत्रकार सम्मेलनमा राष्ट्रपति ट्रम्पले उक्त आरोपको जाँच गर्न विशेष अनुसन्धानकर्ता नियुक्त गर्ने निर्णयलाई आफूले स्वागत गर्ने बताए । तर, उनले सो निर्णयप्रति असन्तुष्टी पनि व्यक्त गरेको अन्तरराष्ट्रिय सञ्चार माध्यमहरुले जनाएका छन् ।

अमेरिकामा नयाँ राष्ट्रपति चयनका लागि गत वर्ष भएको निर्वाचनमा रुसको हस्तक्षेप भएको भनिएको विषयमा छानविन गर्न संघीय जाँच विभाग (एफबीआइ)का पूर्वप्रमुख रोबर्ट मलरलाई विशेष अभियोजनकर्ताको रुपमा नियक्त गरिएको छ । मलर सन् २००१ देखि २०१३ सम्म एफबीआइका प्रमुख थिए ।

राष्ट्रपति ट्रम्पले एफबीआइका निर्देशक जेम्स कोमीलाई अघिल्लो हप्ता बर्खास्त गरेसंगै नयाँ विशेष अभियोजनकर्ताको खोजी भएको थियो ।

ट्रम्पले एफबीआइले रुसमाथि गरिरहेको छानविन प्रभावित पार्न त्यसका निर्देशक कोमीलाई बर्खास्त गरेको भन्ने आरोप पनि खण्डन गरेका छन् । कोमीसँग काम गर्न आफूलाई निकै गाह्रो भएकाले उनलाई बर्खास्त गर्नुपरेको राष्ट्रपति ट्रम्पले स्पष्टीकरण दिएका छन् ।

अमेरिकाको न्याय मन्त्रालयले त्यतिबेला भएको भनिएका हस्तक्षेपबारे छानविन गर्न वर्तमान प्रशासनभन्दा बाहिरका व्यक्तिलाई जिम्मा दिनु उपयुक्त हुने ठानेर मलरलाई जिम्मेबारी दिएको अधिकारीहरुले बताएका छन् ।

मलर न्याय मन्त्रालय अन्तर्गत नै काम गर्ने गरी नियुक्त भएका हुन् । न्याय मन्त्रालय भने राष्ट्रपति ट्रम्प अन्तर्गत नै पर्ने निकाय हो । तर, मलरलाई स्वतन्त्र भनिएपनि प्राविधिकरुपमा भने राष्ट्रपति ट्रम्प अन्तर्गत नै पर्ने भनेर सांसदहरुले टिप्पणी गरिरहेका छन् । सिन्ह्वा