भिडियो

कुरा: खस्रा मिठा

अरुको इशारमा केपी ओली यसरी उत्तेजित भएका हुन् (भिडियो अन्तर्वार्ता)

शनिबार, २८ फागुन २०७३ गते प्रकाशित
- नेपाल आज (DR)

अरुको इशारमा केपी ओली यसरी उत्तेजित भएका हुन् (भिडियो अन्तर्वार्ता)

विगत डेढ दुई वर्षदेखि झडपको स्थिती आउँछ भनेर मैले अन्दाज लगाउँदै आएको छु । मूलतः यो संविधानकै प्रतिफल हो । यो स्थिती आउँछ भनेर जान्दाजान्दै एमालेजस्तो खारिएको र यति लामो समयसम्म राजनीतिमा रहेको दलका केपी ओली त्यति उत्तेजित भएर सप्तरीमा प्रस्तुत हुनु दुर्भाग्यपूर्ण हो ।

 

राजनीतिक सभा सम्मेलन गर्नु भनेको सबैको मौलिक र संवैधानिक अधिकार हो । यो बहसको विषय होइन । तर, यसलाई कसरी बुझ्न सकिन्छ भने, आफ्नो जमिनमा खेतिपाती गर्ने सबैको अधिकार हुन्छ । तर, मंसिरममा गएर धानको बिऊ राख्न खोजियो भने उचित हुँदैन । त्यसकारण अधिकारलाई बुद्धिमानपूर्ण प्रयोग गर्नुपर्छ । यसले उत्तेजनात्मक स्थिती ल्याउँदै छ भन्ने बुझेपछि त्यहाँबाट गएर प्रस्तुत हुने शैली र उत्तेजनालाई भड्काउने किसिमले प्रस्तुत हुनु हुँदैनथ्यो ।

त्यहाँ केपी ओलीले मधेसको असन्तुष्टि हामीले बुझेका छौँ यो समस्या हामी आफैँ यहीँ बसेर छलफल गर्छौ भनेर भन्न सक्थे । तर, केपी ओलीजस्तो मान्छेले त्यहाँ कालो झण्डा देखाएर युथ फोर्सका केटाहरु ल्याउँछु भन्दै धम्काएको सुहाएन । उहाँजस्तो व्यक्ति देशलाई विभाजन गर्ने ग्र्याण्ड डिजाइनको स्क्रिप्टअनुसार चल्नु हामी सबैको लागि दुर्भाग्यपूर्ण कुरा हो ।

 

एमालेले मेची–महाकाली अभियानमा मधेसी मोर्चाले मधेसमा फैलाएको भ्रमलाई हटाउनका लागि गरेको भन्ने कुरा म मान्दिन । त्यहाँ त्यसरी उत्तेजीत भएर भाषण गर्नुभन्दा त्यो उत्तेजनाबाट अलिकति पछि हटेर कार्यक्रम गरेको भए एमालेको गरिमा घट्ने थिएन ।

 

अहिले एमालेको जति पनि घटना घटिरहेको छ । यो एमालेभित्रकै रणनीतिलेमात्र यसमा काम गरिरहेको छैन । एमाले भित्रको अहिलेका नेताहरुको जुन सांगठनिक स्थिति छ, त्यसमा अन्तराष्ट्रिय खेलो फड्को गर्ने र एमालेका नीतिलाई प्रभाव पार्ने तत्वहरुले राम्ररी काम गरिरहेका छन् । केपी ओलीलाई उत्तेजित गराएर उपयोग नै गरिएको छ ।नेपालका धेरै ठूला नेताहरुलाई आफूलाई उपयोग गरिएको ज्ञान हुँदैन । उपयोग भइसकेपछि बल्ल चेत हुन्छ । कतिपय नेताहरुले पश्चताप नै गर्न पाएनन् । केपी ओली दोस्रो पटक उपयोग भएको देख्छु । उहाँले पश्च्ताप गर्ने समय पाउनुभएको छ तर गर्नुहुन्न ।

 

एमालेको अहिलेको सांगठनिक स्थिती र नेताहरुको स्थितीमा जसरी खेलोफड्को भएको छ, त्यही स्थिती कांग्रेसमा पनि भएको छ र मधेसी मोर्चामा पनि भइरहेको छ ।

 

गिरिजाबाबुलाई पनि नेपालमा बाह्र बुँदे सहमति गरेर शान्ति सम्झौता गरेपछि उनको काम इतिहासमा रहन्छ भनेर उक्साइयो । त्यही बाह्र बुँदेमा टेकेर आएका विषयवस्तुले अहिले हामीलाई कतिसम्म असर पारिरहेको छ भन्ने कुरा सबैले बुझेका छन् । सुशील कोइरालालाई पनि बिपीले नसकेको संविधान सभामार्फत एक थानको संविधान ल्याउनुभयो भने युगान्तकारी मान्छे बन्न्ुहुन्छ भने भनियो । संविधान आयो यस्तो । जसको परिणाम अहिले हामीले भोग्दै छौँ ।आज केपी ओलीको नेतृत्वको पार्टी म आन्तरिक फाँसीबादबाट पनि तल देख्छु । माधव नेपाल र झलनाथ खनालहरुको स्थिती देखेर कहिलेकहीँ दया लागेर आउँछ ।

 

मधसी मोर्चामा पनि कताबाट को को व्यक्ति उपयोग भएका छन् भन्न सकिदैँन । विभिन्न थरिका मानिसहरु छन् । संविधानमा उठाउनुपर्ने मूल कुरा नउठाएर भुरे टाकुरे कुराहरु उठाउँदै हिड्छन् । पूर्नविचार गर्नुपर्ने भनेको मूल रुपमा धर्म निरपेक्षता र संघीयतामा हो । अरु विषयहरु ल्याएर संविधान संशोधनमा विवाद ल्याइएको छ ।

 

एमालेभित्र के हुन्छ भने, जसरी केपी ओलीलाई उपयोग गरिराखिएको छ । त्यही शैलीलाई उपयोग गर्न इश्वर पोख्रेल र भिम रावलजस्ता उत्तराधिकारी स्थापित गरिएको छ । त्यो शैली विफल गराउन पनि अर्कोतिरबाट डिजाइन भइरहेको छ । सँगसँगै माधव नेपाल र झलनाथ खनाललाई धुलो चटाउन पनि इश्वर पोख्रेलले बोलेरै सुरु गरिसके । वामदेव गौतमलाई केपी ओलीले नै राजनीतिक साइजमा पुर्यादिसकेका छन् । विगत ३, ४महिनादेखि हेर्दा एमालेभित्र सुवास नेम्बाङलाई नेताको रुपमा स्थापित गराउन सबैतिरबाट निर्माण गरिदैँ छ । अब कार्यकारी भूमिकामा सुवास नेम्बाङलाई लिएर आउने चाँजोपाँजो लिएर आइदै छ ।

(विश्लेषक अरुणकुमार सुवेदीको भिडियो अन्तर्वार्ताबाट)