समाचार

व्यवसायी गौचनको हत्यामा संलग्न पाँचजना पक्राउ

मङ्गलबार, २८ कार्तिक २०७४ गते मा प्रकाशित

sharad kumar gauchan

नेपाल निर्माण व्यवसायी महासंघका अध्यक्ष शरदकुमार गौचनको हत्यामा संलग्न पाँच जना पक्राउ परेका छन् ।

हत्यामा संलग्न भारत विहारका मुकेशकुमार पाण्डे, काठमाडौंका प्रकाश बुढाथोकी, नुवाकोटका राजिव स्याङतान, पर्साका शिवजी महतो र सन्तोष गुरुङ रहेको प्रहरीले जनाएको छ । हत्यामा संलग्न सुटर र अन्य सहयोगीहरु पक्राउ परेपनि मुख्य योजनाकार भने फरार रहेकाे बताएका छन् ।

प्रहरीका अनुसार गौचनको हत्यामा गुण्डानाइके समिरमान सिंह बस्नेत र मनोज पुनको संलग्नता छ । विभिन्न अपराधिक घटनामा संलग्न भएको अभियोग लागेका बस्नेतले देश बाहिरबाटै हत्याको योजना बनाएकाे बताइएकाे छ ।

पक्राउ परेका मध्ये २१ वर्षीय राजीव स्याङतानले गौचनमाथि गोली प्रहार गरेका थिए । त्यस्तै, ३५ वर्षीया शिवजीले हतियार र मोटरसाइकलको व्यवस्थापन गरेका थिए । विहारका २४ वर्षीय मुकेशले हतियार दिलाएका थिए भने पर्साका सन्तोषले मोटरसाइकल दिएका थिए ।

एक महिनादेखि गौचनको निगरानी गरेर हत्या गरेको प्रहरीले जनाएको छ । हत्यामा प्रयोग भएको मोटरसाइकल भारतबाट चोरिएको र नेपाली नम्बर प्लेट राखेर प्रयोग गरिएको थियो । हत्यामा संलग्न समिरमान र मनोजसँगै लोप्साङ, बोका भन्ने गंगा लिङ्देन (लिम्बु), श्यामबहादुर गुम्बे, काले दाई भन्ने अम्बरबहादुर राना, रोशन बुढाथोकी र अजय थापा फरार छन् ।

शरदकुमार गौचनको २३ असोज दिउँसो ३ बजे गोली हानी हत्या गरिएको थियो । काठमाडौंको शान्तिनगर, खरिबोटस्थित घरबाट निस्केर अलि पर पुगेका गौचनमाथि दुईजना व्यक्तिले गोली हानी भागेका थिए । गौचन चढेको गाडीको अगाडिबाट गोली हानिएको थियो । गौचनमाथि तीनओटा गोली हानिएको थियो । एउटा गोली मुटुमा, एउटा कलेजोमा र एउटा गोली पेटमा लागेका गौचनलाई तत्काल नयाँनेश्वरस्थित सिभिल अस्पताल लगिएकामा चिकित्सकले उनलाई मृत घोषणा गरेका थिए ।