खेल

लगातार खराब प्रदर्शन गरिरहेका विनोद भण्डारी किन पर्छन् राष्ट्रिय क्रिकेट टोलीमा घरिघरि

अाजकाे खेलमा पनि फितलाे प्रदर्शन

शुक्रबार, २७ असोज २०७४ गते मा प्रकाशित

Binod BHandari

काठमाडौं । नेपालको राष्ट्रिय क्रिकेट टोलीका नियमित खेलाडी हुन् विनोद भण्डारी । उनले २००९ सेप्टेम्वरमा कुवेतविरुद्ध पहिलो पटक ब्याट्स म्यानको रुपमा डेब्यु गरेका थिए । पहिलो खेलमा नै उनी मैदानमा पुग्दा नेपाललाई अन्तिम बलमा ७ रन चाहिएको अवस्था थियो । उनले त्यही अन्तिम बलमा छक्का प्रहार गरेर खेललाई बराबरीमा रोके । यही दिनदेखि उनले पछाडि फर्केर हेर्नु परेको छैन । यद्यपी उनका एकाध बाहेक अधिकाँश खेल सम्झनलायक छैनन् ।

 हङकङको मिसन रोड ग्राउण्ड मोङ्गकक मा आज भएको खेलमा  विनोदले १८ वलको सामना गर्दै २ चौका र १ छक्काको मद्दतले जम्मा १७ रन मात्र बनाउन सके । कप्तान पारस खड्का र उप कप्तान ज्ञानेन्द्र मल्ल जस्ता भरपर्दा ब्याट्सम्यानहरुले जिम्मेवारपूर्ण खेल खेल्न नसकेको परिस्थितीमा छ्रैटौं क्रममा मैदान प्रवेश गरेका भण्डारीले खेल सम्हाल्न सकेनन् । सुरुवाती सबै ब्याट्सम्यानहरुलाई सस्तैमा गुमाएको नेपालको जीतको लक्ष्य विनोद एक्लैले पनि अगाडी लिएर जानसक्नु पर्रथ्याे ।

सन् २०१४ को विश्वकपमा बल्ल बल्ल स्थान पाएको नेपालले बलियो प्रतिस्पर्धी अफगानिस्तानलाई हराएको थियो । उता हङकङले इंगल्याण्डलाई जितेको खण्डमा नेपाल अर्को चरणमा पुग्ने थियो । नभन्दै उक्त खेल हङकङले उक्त खेलमा जित निकाल्यो । तर नेपालका लागि त्यो जित पर्याप्त भएन । अब बंगलादेशसँग जसरी पनि जित्नु पर्ने थियो । अन्तिम ओभर तिर क्रिजमा आएका विनोद भण्डारीको बंगलादेशी बलरसामु केही चलेन । विनोदले खेललाई अगाडि बढाउनै सकेनन् अर्थात डट बल खेले । यसरी प्रतियोगिताको भाग्य हङकङको हातमा पुग्यो ।

टि ट्वान्टी प्रतियोगितामा विनोदको व्याटिङ औषत जम्मा १०.५५ रन छ । त्यसैगरी अन्तर्राष्ट्रिय टि ट्वान्टी प्रतियोगितामा जम्मा ३.८८ को व्याटिङ औषतले जम्मा ६०.६८ मात्र स्ट्राइक रेट छ । उनले हालसम्म खेलेका प्रतियोगिताको उत्कृष्ट खेल भनेकै पपुवा न्युगिनीविरुद्ध ५१ नटआउट हो, जुन रन भेटाउन जम्मा ३१ बल खर्चेका थिए । त्यसबाहेक विनोदले सम्झनलायक कुनै खेल खेलेकै छैनन् । एक दिवसीयतर्फ उनले २०१५ मा भएको विश्व क्रिकेट लिग डिभिजन टुमा पूरै ६ इनिङ खेलेर २८.८० को औषतले बनाएको १४४ रन नै सर्वाधिक रन हो । पछिल्लो समय विकेट किपरको भूमिकामा पनि देखिएका विनोदले विकेट किपिङमा पनि गतिलो प्रभाव पार्नसकेको देखिँदैन । 

नेपाली क्रिकेट टिमका ‘हार्ड हिटर’ भण्डारीको बाउण्ड्री पनि देख्न मुस्किल छ । तथापी मुलुकभित्र हुने घरेलु प्रतियोगितामा उनले सधैं नै राम्रो प्रदर्शन गर्दछन् । नेपाल आर्मी क्लवका क्याप्टेन रहेका उनी धनगढी प्रिमियर लिगमा कन्चनपुर आइकोनिकका पनि कप्तान थिए । यसैगरी, नेपाल प्रिमियर लिगमा सगरमाथा लिजेण्डको पनि कप्तानकै जिम्मेवारी सम्हालिरहेका छन् । क्यानले नेपाली खेलाडी वर्र्गीकरण गर्दा उनलाई ‘क’ श्रेणीको खेलाडीको मान्यता प्रदान गरेको छ । 
अहिले नेपाली टिम आगामी अक्टोवर १३ र १५ तारिखमा हङकङमा हुने विश्व डिभिजन लिगका लागि भारतको चेन्याईमा स्थानीय क्लवहरुसँग अभ्यास खेल खेलिरहेको छ । जारी तीन वटा अभ्यास खेलमा उनले क्रमशः तीन, सात र शून्य रनमात्र बनाउन सकेका छन् जबकी ज्ञानेन्द्र मल्ल र शरद भेषवाकरले सतकीय पारी खेलिसकेका छन् ।

‘नेपालमा क्याम्पमै छँदा पनि उनले राम्रो प्रदर्शन गर्नसकेका छैनन्,’ नेपाली क्रिकेटको राष्ट्रिय टिममा प्रतिनिधित्व गरिसकेका एक जना पूर्व खेलाडीले भने । नेपालले विश्व क्रिकेट प्रतियोगितामा कीर्तिमानी इतिहास भएका खेलाडीहरुसमेत नअटाएको परिप्रेक्ष्यमा विनोद कसरी नियमित अटाइरहेका छन् । यो भने चासोको विषय बनेको छ, नेपाली क्रिकेटका शुभचिन्तकहरुमा । तर यो पनि हल्ला चलिरहेको छ कि विनोद भण्डारी उपकप्तान ज्ञानेन्द्र मल्लका कारण टिममा अटाइरहेका छन् । यो खवर भने पुष्टि हुन बाँकी नै छ ।