प्रवास

समाचार

प्रमको घोषणाः रोजगारीका लागि भारत जान अनुमती लिनु पर्ने, वैदेशिक रोजगारीमा मृत्यु भए २० लाखसम्म क्षतिपुर्ति

मङ्गलबार, ११ माघ २०७३ गते मा प्रकाशित

prachanda

माघ - ११ । प्रधानमन्त्री पुष्पकमल दाहाल प्रचण्डले वैदेशिक रोजगारीमा रहेका नेपालीहरुका लागि विशेष सुविधासहितको योजना सार्वजनिक गरेका छन् । उनले वदैशिक रोजगारमा रहेका नेपाली युवाहरुको बिमा र अन्य सुविधाबारेमा मङ्गलबार पत्रकार सम्मेलन गरी महत्वपूर्ण घोषणा गरेको हुन् । प्रधानमन्त्री प्रचण्डले १५ बुँदे कार्यक्रम सार्वजनिक गर्दै भारत जाने सबै बालिग नागरिकको अनिवार्य बिमा गर्नुपर्ने नयाँ व्यवस्था गरेका छन् । रोजगारीका लागि भारत जान पनि अब सरकारसँग अनुमति लिनु पर्ने भएको छ । प्रधानमन्त्री प्रचण्डले भारतलाई बैदेशिक रोजगारीमा राख्दै नयाँ व्यवस्था घोषणा गरेका हुन् । सरकारले रोजगारीका लागि भारतमा जाने कामदारहरुका लागि पनि पहिलोपटक जीवन बिमा अनिवार्य गर्ने निर्णयसमेत गरेको छ । नयाँ व्यवस्था अनुसार भारतमा रोजगारी गर्न जाने नागरिकलाई वैदेशिक रोजगारको लागि अन्य देश जाने नागरिकसरह घातक रोगवापत ५ लाख, जीवन बिमावापत ७ लाख ५० हजार रुपैयाँ र बोर्डबाट अधिकतम् १ लाख ५० हजार रुपैयाँसहित जम्मा १४ लाखसम्म राहत तथा क्षतिपूर्ति दिने व्यवस्था गरिएको छ । साथै वैदेशिक रोजगारमा गएका नेपालीहरुको हालको १० लाख रुपैयाँको जीवन बिमा रकमलाई दोब्बर बनाएर २० लाख र्पुयाइएको घोषणा प्रधानमन्त्रीले गरेका छन् । यो व्यवस्था आगामी फागुन १ गतेबाट लागू गर्ने तयारी सरकारले गरेको छ ।