बिहारबाट पसेकाहरुले मधेस बिगारे, यीनलाई नलखटेसम्म मधेसीको मुक्ति हुँदैन

Want create site? Find Free WordPress Themes and plugins.


–सञ्जीवकुमार झा

आफूलाई मधेसवादी हुँ भन्ने क्षेत्रीय चानचुन पार्टीका नेताहरुले हामीलाई नश्लवादी भन्छन् । यी अज्ञानीहरुलाई नश्लको परिभाषा नै थाहा छैन । केपी ओलीलाई नश्लवादी भन्नेहरुले बुझेका छैनन् कि मधेसी र ओलीको नश्ल एउटै हो । अर्थात मधेसी र पहाडी दुवै आर्यन हुन् । आर्यन र मंगोलियनको नश्ल फरक हुन्छ । यहाँ त केपी ओली नश्लवादी भयो, मधेसीलाई अपमान गर्यो भनिरहेका छन् । खासमा केपी ओलीको बेग्लै नश्ल छैन, होइन ।

हुँदै नभएको, भन्ने नहुने शब्द नश्लवादी यिनीहरुले भन्नुको कारण गहिरो छ । ६२ सालपछि र त्यो भन्दा अगाडि नेपालको प्रशासनिक कमजोरीको फाइदा उठाएर नेपालको नागरिकता लिएकाहरुले मधेस खान लागि सके । यिनीहरुले हामी मधेसका रैथानै मेधेसीलाई लखटेर, अल्पमतमा पारेर हामीमाथि राज गर्न खोजिरहेका छन् ।

जसको तराईका सबै जिल्लामा कार्यालय छैन, कार्यकर्ता छैनन्, आमसभा गर्ने हैसियत छैन, महाधिवेशन पनि कोठाभित्र हुन्छ त्यस्ता पार्टीले भनिरहेका छन् कि एमाले मुक्त मधेस बनाउँछौं । अब चुनाव हुन दिनुहोस यी ‘विदेशी दलालमुक्त मधेस’ एमालेले बनाउँछ ।

एमालेसँग पाँचलाख संगठीत सदस्य छन् । विगतको संविधान सभा निर्वाचनमा मधेसमा एमाले र मधेसी दलले पाएको मतका हिसाब गर्ने हो भने ७६ प्रतिशत मत हामीले पायौं । बाँकी २४ प्रतिशत मत सबै मधेसवादी भनिने क्षेत्रीय दलहरुले पाए । यसकारण यी दलहरुको कुनै हैसियत नै छैन । यिनीहरुले एमालेलाई केही गर्न सक्दैनन् ।

एमाले मुक्त मधेस भनेर हल्ला गर्नुको कारण चाहिँ छिमेकीले दिएको पैसाले काम गर्दैछ भन्ने सन्देश दिल्ली पुर्याउनु हो । एमाले मुक्त होइन अब मधेस एमालेयुक्त हुन्छ । यो थाहा पाएका दलालहरु अहिले छट्पटाएका हुन् ।

यी दलहरुले विगतमा मधेसमा भ्रम छरे । ६२ सालमा लिएको नागरिकता खोसिन्छ, मधेसीलाई लखटिन्छ, सरकारी जागिर मधेसीले पाउँदैनन भनेर भ्रम फैल्याए । जबकी संविधनमा मधेसीलाई अधिकार नदिइएको कुनै ठाउँ छैन ।

एमाले राष्ट्रिय पार्टी हो । यो पार्टीसँग भिड्नु भनेको आफैले आफ्नो विनाशलाई निम्तो दिनु हो । तर एमालेलाई मधेसमा यी क्षेत्रीय पार्टीहरुले विथोल्ने कोसिस गरिरहेका छन् । एमालेले सशक्त प्रतिकारमा आउने बेला भएको छ ।

एमालेले बजेटमा सबैभन्दा बढी मधेसका लागि कार्यक्रम ल्यायो । मधेसको हितमा एमाले नै अगाडि छ । तर एमालेसँग मधेसका लागि सुन छ कि लसुन छ नदेखाइ भएन ।

अहिले आफूलाई जो जसले मधेसवादी भनिरहेका छन्, यिनीहरुले कहिले पनि मधेसका गरिब, उत्पीडित जनताको लागि काम गरेको इतिहास छैन । आन्दोलनमा मारिनेलाई ५० लाख दिने घोषणा गर्नेहरु यिनीहरु नै हुन् । अहिले मधेसवादी दलहरु सत्ता पक्षका हुन् खै त त्यो ५० लाख दिएको ?

५० लाखको त कुरा छाडौं, सरकारले आन्दोलनमा घाइतेभएकाहरुका लागि दिएको पैसा पनि मधेसी नेताहरुले बाँडेर खाए । जनतालाई दिएनन् । सत्तामा हुँदा मधेसवादी दलका कुन नेताले मधेसका लागि के काम गर्यो ? कुनै एक काम पनि छैन देखाउन मिल्ने ।

सबैभन्दा लामो समय यिनै नेताहरु सरकारमा बसे । कांग्रेस एमालेसँग मिलेर कैयन पटक सरकार बनाए । सबैजसो मन्त्रालय चलाए । धन, सम्पत्ति कमाए । सात पुस्तालाई पुग्ने गरी धन पनि जोडे । अहिले आएर भन्छन् कि कांग्रेस एमालेका पहाडे शासक मुर्दावाद ।

सत्तामा बसेर तर मारुन्जेल पहाडे शासक जीन्दावाद नै भयो । जब आफ्नै जिल्लाबाट, आफ्नै क्षेत्रबाट जनताले पत्तासाफ गरिदिए अनि भन्छन एमाले नश्लवादी, पहाडे शासक मुर्दावाद । यो अति होइन ?

राजेन्द्र महतो, महन्थ ठाकुर, हृदेश त्रिपाठीलगायत नेताहरुलाई जनताले लखेटेकै हुन् । जो आफनो क्षेत्रबाट १५ हजार मत ल्याउन नसकेर हार्छ, उसैले भन्छ कि –मधेसमा दुई प्रदेश चाहिन्छ । के मधेस उनीहरुको बाउको बीर्ता हो ? चुनावमा हारेका हरुवाहरुले मधेसको ठेक्का लिने ? यो कहाँको न्याय हो मलाई बताइदिओस कोही ।

पहाड मधेस जोडिन्छ
पहाड र मधेस नजोडी प्रदेश नम्बर २ बन्यो । त्यो गलत भयो । एमालेले त्यसलाई सच्याउने बताइसकेको छ । पहाडबाट प्राप्त हुने अनेक लाभ मधेसका जनताले पनि बराबरी पाउनु पर्छ । पहाडमा पहाडी बस्छन् भन्दैमा त्यहाँको स्रोत साधन मधेसीले नपाउने हुँदैन । पहाडको स्रोत साधनमा मधेसीको पनि बराबर हक लाग्नु पर्छ, जति पहाडीको लाग्छ । यसकारण दुई नम्बर प्रदेशमा पनि पहाडी जिल्ला जोडिनेछ । पाँच नम्बर प्रदेश टुक्रिने त कुरै छैन । अहिले संविधान कार्यान्वयनको चरण हो । चुनाव भन्दा अगाडि सीमांकन फेरबदल गर्न मिल्दैन । यसकारण पहिले चुनाव अनि दुई नम्बर प्रदेशमा पहाड मिसाउने काम हुनेछ ।

बिहारीले मधेस विगारे
सद्भावना पार्टीका अध्यक्ष राजेन्द्र महतो सच्चा नेपाली होइन । उनको जन्म भारतमा, पढाई भारतमा, घर भारतमा छ । उनी राजनीतिका माध्यमबाट पैसा कमाउन नेपाल आएका हुन् । राजनीति गर्न नागरिकता चाहिने भएकोले उनले नेपालको नागरिकता लिए । आफूले लिएपछि बाबुको पनि बनाइदिए । पटक पटक मन्त्री भएपछि उनले करोडौ रुपैया कमाए । काठमाडौंमा आलिसान घर बनाए । उनी नेपाली होइनन्, जन्मले पनि होइनन्, कर्मले पनि होइनन् । राजनीतिक धर्मले पनि होइनन् । उनको नागकिरता त नेपाली प्रशासनको दुष्परिणाम मात्रै हो । यसकारण उनलाई मधेस र मधेसीको माया लाग्दैन । नेपाल र नेपालीको त के कुरा गर्नु ।

यसकारण यी बैसाखे मधेसीहरु जो ६२ सालपछि नेपालको नागरिकता लिएर हामीलाई नै अल्पमतमा पार्न खोजिरहेका छन् यी सबैलाई जहाँबाट आएका हुन् त्यतै पठाउनु पर्छ । अनि मात्रै मधेसका रैथाने, सच्चा मधेसीको मुक्ति सम्भव छ ।

जसरी युवाहरु लागू औषधको कुलतमा पर्छ, लागू औषधले ग्रसित हुन्छ, ठीक त्यसै गरी यी मधेसी भनाउँदाहरु पनि सत्ता र पैसाको लतमा फसेका छन् । यीनीहरु सत्ता र पैसाको दुव्र्यसनी हुन् । यी ग्रसित बिरामीहरु हुन् । यीनलाई भोट होइन उपचारको खाँचो छ ।

(युवा संघका सचिवालय सदस्य झासँग गरिएको कुराकानीमा आधारित)

Did you find apk for android? You can find new Free Android Games and apps.

फेसबुक प्रतिक्रिया