नाकाबन्दी भारतले गरेको होइन भन्नेहरु सबै नक्कली नेपाली हुन्

Want create site? Find Free WordPress Themes and plugins.

 

करिब २५ वर्ष राष्ट्रिय प्रजातन्त्र पार्टीमा आवद्ध रहेका पुराना नेता पर्शुराम खापुङ अहिले नयाँ शक्ति नेपालमा हुनुहुन्छ । राप्रपामा महामन्त्री, प्रवक्ता, सचिवलगायत पदमा रहेर काम गर्नुभएका खापुङ पूर्वमन्त्री पनि हुनुहुन्छ । प्रमुख दलहरु संविधान संशोधन, निर्वाचन आदिमा केन्द्रीत भइरहँदा नयाँ शक्ति भने शक्ति आर्जनमै व्यस्त छ । राजनीतिको मूल प्रवाहमा आइनसकेको पार्टी र त्यो पार्टीका नेता पर्शुराम खापुङको धारणा बुझ्ने प्रयास गरेका छौं । प्रस्तुत छ नयाँ शक्तिका नेता खापुङसँग भएको कुराकानीको संपादित अंशः 
तपाई र बाबुराम भट्टराईको पृष्ठभूमि नै फरक, कसरी नयाँ शक्तिमा अटाएर काम गरिरहनु भएको छ ?
– पृष्ठभूमि भन्ने कुरा समय सापेक्ष हुन्छ । एउटा परिस्थितिमा म राप्रपामा थिएँ । राप्रपाबाटै मुलुकको हित, जनताको हित गर्न सकिन्छ भन्ने मेरो दृढ विश्वास थियो । जसकारण मैले लामो समय राप्रपामा बिताएँ । विभिन्न पदमा रहेर काम गरेँ । तर त्यो जब राप्रपाबाट देश र जनताको हित हुँदैन भन्ने लाग्यो, अनि पार्टी छाडे । अहिले नयाँ शक्तिमा छु । अबको राजनीतिक एजेन्डा भनेको समृद्धि हुनु पर्छ भन्ने मेरो मान्यता हो । यो मान्यता नयाँशक्तिको पनि हो । मान्यता मिलेपछि बाबुराम भट्टराईसँग मिल्न के गाह्रो भएको छैन ।

तपाईले राप्रपा छाड्ने बेला भन्नुभएको थियो कि यो पार्टीमा बसेर देश र जनताको सेवा गर्न सकिने रहेनछ, यसकारण पार्टी छाडेँ । तपाईलाई त्यही पार्टीले मन्त्री बनायो, त्यो भन्दा देश र जनताको लागि सेवा गर्ने अर्को अवसर के हुन सक्थ्यो ?

–राप्रपामा मैले २५ वर्ष बिताएँ । फरक फरक खाले जिम्मेवारी सम्हाले । तर पार्टीमा जालझेल, षडयन्त्र, चाप्लुसी मौलाउँदै गयो । युगको हाँक अब राप्रपाले थाम्न सक्दैन भन्ने निचोडमा पुगेँ । त्यसपछि बाबुराम भट्टराईले नयाँ पार्टी खोल्ने बताउनु भएको थियो । उहाँसँग कुराकानी भयो । र हामीले नयाँ पार्टी खोलेका हौं । मैले एक पार्टी छाडेर अर्को पार्टीमा प्रवेश गरेको होइन, एक पार्टी छाडेर अर्को पार्टी गठन गरेको हो भन्नु उपयुक्त हुन्छ । यसमा अर्को महत्वपूर्ण कुरा के भने नेपालमा अहिलेका पार्टीहरु कुनै न कुनै हिसाबले ‘डेट एक्स्पायर्ड’ भइसकेका छन् । हिजोको दिनमा एमाले, कांग्रेसको आवश्यकता थियो । उनीहरुले गरे । तर अब उनीहरुले पुरानै एजेन्डा बोकेर हिँड्न हुँदैन । तर उनीहरु बदलिँदो समयअनुशार परिवर्तन हुन सकेका छैनन् । यसकारण नयाँ शक्तिको आवश्यकता भएको हो ।

१० वर्षसम्म जनयुद्ध हाँक्ने नेतालाई अहिले आफ्नो नेता बनाउनु भएको छ । तपाईलाई चाहिँ के लाग्छ, त्यो जनयुद्ध ठीक थियो ?
–जनयुद्ध ठीक कि बेठीक भनेर अहिले भन्नु सान्दर्भिक नहोला । त्यो बेला माओवादी र राज्यपक्षबाट भएका ज्यादती, अत्याचारबारे सत्य निरुपण होला एक दिन । गलत गर्नेले कुनै सजाय अवश्य पाउलान् । आयोग गठन भएपछि त्यही निकायले धेरै गर्ला । यसबारे म टिप्पणी गर्दिनँ । अहिले त हामी समृद्धिको पक्षमा छौं । राजनीति धेरै गरियो, अब मुलुकलाई समृद्ध बनाउनु पर्छ । यसका लागि राजनीतिक स्थायीत्व चाहिन्छ । राजनीतिक स्थायीत्वका लागि प्रत्यक्ष निर्वाचित कार्यकारी प्रमुख हुनुपर्छ । यसकालागि हामी आवाज उठाउनेछौं ।

नेपालमा संघीयता नै चाहिँदैन भन्ने जमात पनि ठूलो छ । तपाईको बिचारमा यो देशमा प्रदेश चाहिँ कतिवटा चाहिएला ?
– यो प्रश्न जनताको अधिकारसँग सम्बन्धित छ । यहि मुलुकमा रहेर पनि सदियाँैदेखि राज्यको मूल प्रवाहमा आउन नसकेका धेरै जातजाति, भाषाभाषी छन् । ती सबै जातिजातिलाई हामीले जागरुक बनाउन सक्यौं भने राष्ट्रियता बलियो हुन्छ । अहिले प्रदेश सीमांकनका विषयमा उठेको विवाद प्रमुख तीन दलको कारणले सिर्जना भएको हो । ७४ माघ भित्र तीन वटा निर्वाचन हुनुपर्छ । तर कोही पनि निर्वाचनका लागि गम्भीर छैनन् ।
मुलुकको समस्या न सरकारले बुझ्यो, न तीन दलले । अहिले मुलुक अन्यौलमा फस्दै गएको छ । यसको प्रमुख कारक तीन दल हुन् ।

निर्धारित समायावधि भित्रै निर्वाचन होला ?
– हुनुपर्छ भन्ने हाम्रो मान्यता हो । तर मुलुकमा भइरहेका खेल हेर्दा चुनाव होला जस्तो लाग्दैन । मुलुक झन झन संकटमा पर्दै गएको छ । नेपालमा लेन्डुप दोर्जे जन्मिन खोजिरहेका छन् ।

एमालेका केही नेताले प्रचण्डलाई लेन्डुप दोर्जे हुन खोजको बताउने गर्छन्, तपाईको इशारा पनि त्यतै हो ?
–मेरो इशारा यसलाई वा उसलाई भन्नु भन्दा पनि लेन्डुप दोर्जे प्रवृत्तिका मानिसहरु जन्मने खतरा देखेको छु । एमालेले भन्ने कुरा आफ्नो ठाउँमा होला ।

निर्वाचनमै जोडन चाहन्छु, निर्वाचन भयो भने नयाँ शक्तिले बढीमा गोरखाबाट एक सिट जित्छ पनि भन्नेहरु छन्, के भन्नुहुन्छ ?
–हामीले कति र कसरी निर्वाचन जित्छौं भन्ने कुरा त पहिले निर्वाचन हुन दिनुहोस् न अनि थाहा हुन्छ । तर यो सरकारको निर्वाचन गराउने छाँट देख्दिनँँ । आफ्नो तलब बढाउने सबै पार्टीका नेताहरु मिलेर विधेयक पास गरे । तर देशको हित हुने कुरामा यिनीहरु मिल्दैनन् । अब निर्वाचन पनि नगराउने र संसदको आयु बढाउने खेलमा दलहरु लागिसकेका छन् भन्ने मेरो ठहर हो ।

संविधानमा कुनै पनि दलले भने झै विषय समावेश भएका छैनन् । यो एक सम्झौताको दस्तावेज बनेको छ । तर मधेसी मोर्चामा आवद्ध दलहरु आफूले भने झै नभए देश नै खाडलमा जाओस झै गरी अगाडि आएका छन् । तपाईलाई कस्तो लाग्छ ?
–अहिलेको संविधान अपूर्ण छ । यसलाई पूर्ण गर्न संविधान संशोधन आवश्यक छ । संविधान संशोधनको माग मधेसी मोर्चाले गर्यो । संशोधन प्रस्ताव सरकारले ल्यायो । अहिले मधेसी मोर्चाले पनि त्यसको स्वामीत्व लिएको छैन । प्रतिपक्षी दलले पनि विरोध गरेका छन् ।

मलाई आश्चर्य लागेको विषय भने कसैको सहमति हुँदैन थियो भने सरकारले हचुवाको भरमा किन ल्यायो संविधान संशोधन प्रस्ताव ?
अर्को कुरा, मधेसी नेताहरु वा मधेसी दलहरु मात्रै छैनन् तराईमा । तराईमा अरु पनि छन् । अरु दलहरुले पनि तराईको प्रतिनिधित्व गर्छन् । यसकारण मधेसी दलहरुले तराईको ठेक्का लिइरहनु पर्दैन । तराइको सबै ठेक्का उनीहरुले लिने, अनि बाँकी तराईका प्रतिनिधिले चाहिँ के गर्ने ? तराईबाटै पराजित भएका, जनताबाट तिरष्कृत भएकाहरुले सबै काम आफै गर्छौ भनेर हिँडन अलि सुहाउँदैन ।

भारतले नाकाबन्दी गर्छ, मधेसीले स्वागत गर्छन्, सरकारले संविधान संशोधन प्रस्ताव ल्याउँछ भारतले स्वागत गर्छ, किन यस्तो भइरहेको छ ?
–मूल समस्या मधेस, पहाड र हिमाल भन्ने भावना हो । समस्या मधेसमा मात्रै छैन । सबैतिर छ । एक ठाउँको मात्रै कुरा गर्नुको अर्थ छैन । त्यो नाकाबन्दीको कुरा गर्ने हो भने स्पष्ट रुपमै सानो मुलुक नेपालमाथि भारतले गरेको अत्याचार हो । त्यो नाकाबन्दीलाई भारतले गरेको होइन भनेर यदि कसैले भन्छ भने बुझ्नु पर्छ कि त्यो नेपालको नागरिक होइन । नक्कली नागरिक हो ।

Did you find apk for android? You can find new Free Android Games and apps.

फेसबुक प्रतिक्रिया